धादिङ २५ माघ
धादिङ निर्वाचन क्षेत्र नं. २ का नेपाल कम्युनिष्ट पार्टीका उम्मेदवार रामबहादुर भण्डारीले जनयुद्धका क्रममा आफूलाई गोली लागेको स्थान नीलकण्ठ नगरपालिका–१० गोलाभञ्ज्याङबाट मतदाता भेटघाट अभियानको शुभारम्भ गर्नुभएको छ ।
जिल्ला इञ्चार्ज पुष्प विक्रम मल्लको प्रमुख आतिथ्यतामा सम्पन्न कार्यक्रमलाई सम्बोधन गर्दै भण्डारीले गोलाभञ्ज्याङका स्थानीयले दिएको जीवनदान आफूले कहिल्यै नबिर्सने बताउनुभयो । “मलाई पुनर्जन्म दिने यही ठाउँ हो, यहीँका जनताले मेरो जीवन बचाउनुभयो,” भावुक हुँदै भण्डारीले भन्नुभयो ।
शुभारम्भ कार्यक्रममा केन्द्रीय सदस्य दिपा सिंखडा, केन्द्रीय सदस्य तथा उम्मेदवार रामबहादुर भण्डारी, केन्द्रीय सदस्य जगत सिंखडा, केन्द्रीय सदस्य मनराज भण्डारी (शैलश) लगायतको उपस्थिति रहेको थियो ।
कार्यक्रममा स्थानीयले पनि पालैपालो माइक समात्दै भण्डारीलाई उद्धार गरेको त्यो रातको स्मरण सुनाएका थिए । “उहाँ बेहोस अवस्थामा हुनुहुन्थ्यो, सास फेर्न पनि गाह्रो भइरहेको थियो। गोली देब्रे छातीमा लागेको थियो । आश कम भए पनि हामीले प्रयास ग¥यौँ र सफल भयौँ,” एक स्थानीयले भावुक हुँदै बताए । “हामीले बचाएको मान्छेलाई भोट नदिने कुरा आउँदैन,” उनीहरूको भनाइ थियो ।
२०५५ जेठ १९ गते जनयुद्ध दमनका लागि सञ्चालन गरिएको ‘किलो शेरा–टु’ अपरेसनका क्रममा तत्कालीन सशस्त्र र जनपथ प्रहरीले भण्डारीको घरमा घेरा हाली पक्राउ गरी निर्ममतापूर्वक कुटपिट तथा यातना दिएको थियो । पार्टीको गोपनीयता नखोलेपछि साबिक ज्यामरुङ–८ गोलाभञ्ज्याङमा छाती, हात र निधारमा गोली हानी मृत ठानेर मकैबारीमा फालिएको थियो ।
स्थानीयको सहयोग, विशेषगरी हाल बेपत्ता छोरा शुभासचन्द्र भण्डारी र भतिजी भगवती भण्डारीको सक्रियतामा तथा धादिङ र काठमाडौंका पर्यटन व्यवसायीहरूको सहयोगमा भण्डारीलाई जिल्ला अस्पताल हुँदै त्रिवि शिक्षण अस्पताल महाराजगञ्ज पुर्याएर उपचार गरिएको थियो ।
तत्कालीन अवस्थामा माओवादीलाई सहयोग गर्नु जोखिमपूर्ण हुँदाहुँदै पनि ज्योति अधिकारी, गणेश सिम्खडा, हरि धरेल, विष्णु पुकार श्रेष्ठलगायतले घाइते भण्डारीलाई उपचारका लागि महत्वपूर्ण सहयोग गरेका थिए ।
उपचारकै क्रममा भण्डारीलाई प्रहरीले पुनः गिरफ्तार गरी ३ वर्ष २ महिना ७ दिन जेल राखेपछि रिहा गरिएको थियो ।
भण्डारीका अनुसार जनयुद्धका क्रममा उहाँका दुई भाइ छोरा बेपत्ता भएका छन् ।
