धादिङ– नेपाल कम्युनिष्ट पार्टी (एमाले) धादिङ–काठमाडौं सम्पर्क कमिटीले निर्वाचनलाई लक्षित गर्दै बृहत् कार्यक्रम आयोजना गरेको छ । निर्णायक राष्ट्रिय शक्ति निर्माणको संकल्प, समृद्ध नेपाल र सुखी नेपाली हाम्रो गन्तव्य भन्ने मूल मर्मका साथ उम्मेदवार तथा नेकपा एमालेका नेताहरुसँग निर्वाचन विशेष बृहत कार्यक्रम गरेको हो ।
कार्यक्रममा धादिङ निर्वाचन क्षेत्र नम्बर १ बाट नेकपा एमालेका उम्मेदवार भूमि त्रिपाठीले नागरिकको चाहना र आवश्यकता अनुसार काम गर्ने प्रतिबद्धता जनाएका छन् ।
‘लोकतन्त्र, संविधान र राष्ट्रको रक्षाका लागि यो निर्वाचन निर्णायक हो । हामीलाई हार्ने छुट छैन । हामी हार्दा नेपाल हार्छ, लोकतन्त्र र संविधान हार्छ” उनले भने– ‘एमाले एजेण्डासहित चुनावी मैदानमा उत्रिएको र ती एजेण्डाले सम्पूर्ण नेपालीलाई सम्बोधन गर्नेछ । कोमामा पुगेको लोकतन्त्र र संविधानलाई पुनर्जीवित गर्न एमालेको जित आवश्यक छ ।’
त्रिपाठीले नेकपा एमाले नै खेती गर्ने पार्टी भएको दाबी गर्दै एमालेले विकासका फल फलाएको बताए । त्यसलाई सुरक्षित राख्न वडा, बुथ र टोल केन्द्रित अभियान सञ्चालन गरिएको भन्दै आफ्नो जित सुनिश्चित रहेको दाबी गरे ।
त्यस्तै, धादिङ निर्वाचन क्षेत्र नम्बर २ बाट नेकपा एमालेका उम्मेदवार धनबहादुर घलेले बुढीगण्डकी जलविद्युत आयोजना निर्माण र उत्तरी धादिङमा रहेको जस्ता तथा रुवी खानी उत्खननका लागि पहल गर्ने प्रतिबद्धता व्यक्त गरे । देशकै गौरवको आयोजना बुढीगण्डकीको निर्माण कार्य तत्काल सुरु गर्न आफूले पहल गर्ने बताउँदै घलेले नीति, नियम र कानुनको अभावका कारण रोकिएको खानी उत्खननलाई अगाडि बढाउन आवश्यक पहल गरिने बताए । धादिङको विकास तथा नागरिकको चाहना र आवश्यकता अनुसार शिक्षा, स्वास्थ्य, खानेपानी, सडक सञ्जाल जस्ता क्षेत्रमा काम गर्ने उनको भनाई ।
कार्यक्रममा एमाले धादिङका अध्यक्ष अर्जुनकुमार श्रेष्ठ (गोर्खाली) ले देशको विकास र वर्तमान अप्ठ्यारो परिस्थितिबाट निकास दिने पार्टी नेकपा एमाले मात्र भएको बताए । ‘निर्वाचन अभियानका क्रममा मतदाताहरू एमालेको पक्षमा मतदान गर्न फागुन २१ को प्रतीक्षामा छन्’ उनले भने– ‘एमाले विकास र समृद्धिको एजेण्डासहित चुनावी मैदानमा आएको छ । भाषण र आश्वासनभन्दा काम गरेर देखाउनेछौं । नेकपा एमालेलाई मतदान गरी विकासको सहयात्रामा सहभागी हुन सबै मतदातालाई आग्रह छ ।’
