धादिङबेसी, १६ भदौ ।
प्रस्तावित संघीय शिक्षा ऐनको विरोधस्वरूप आज धादिङबेसीमा निजी तथा आवासीय विद्यालयहरूले स्कुल बस र्याली आयोजना गरेका छन्। प्याब्सन, एनप्याब्सन, हिसान र अपेनको संयुक्त आह्वानमा भएको सो आन्दोलनमा जिल्लाका दर्जनौँ विद्यालयहरूले सक्रिय सहभागिता जनाएका थिए। आयोजकका अनुसार ३० भन्दा बढी स्कुल बस र्यालीमा सहभागी भएका थिए।
विद्यालय सञ्चालकहरूले नयाँ शिक्षा ऐनले निजी विद्यालयलाई क्रमशः बन्द गर्ने तयारी गरेको भन्दै आपत्ति जनाएका छन्। उनीहरूको भनाइमा, सरकारले ल्याउन लागेको नयाँ शिक्षा ऐन विभेदकारी छ र यसले निजी विद्यालयको अस्तित्वमै प्रश्न उठाएको छ। प्याब्सन धादिङका अध्यक्ष दिनेश भट्टका अनुसार ऐनमा समावेश गरिएका केही प्रावधानले विद्यालयहरूलाई अन्यायपूर्ण ढंगले निषेध गर्ने प्रयास भएको छ।
आन्दोलनमा धादिङ उद्योग वाणिज्य संघका अध्यक्ष रामकुमार डल्लाकोटीले समेत ऐक्यबद्धता जनाउँदै निजी विद्यालयहरूको मागलाई सम्बोधन गर्न सरकारसमक्ष आग्रह गरेका छन्।
प्याब्सन धादिङका सचिव भीमबहादुर श्रेष्ठका अनुसार विद्यालयहरूले उठाएका प्रमुख मागमा—
• पूर्ण छात्रवृत्ति प्रावधान खारेज गर्नुपर्ने,
• पोशाक, स्टेशनरी तथा खानपान उपलब्ध गराउने बाध्यकारी व्यवस्था हटाउनुपर्ने,
• कम्पनी ऐनअन्तर्गत दर्ता भएका विद्यालयलाई गैरनाफामूलक बनाउन खोजिएको प्रावधान खारेज गर्नुपर्ने लगायतका विषयहरू परेका छन्।
विद्यालयहरूले माग पूरा नभएसम्म आन्दोलन जारी राख्ने चेतावनी समेत दिएका छन्।
