धादिङ — शिक्षक सरुवासम्बन्धी समाचार लेखेको भन्दै सिद्धलेक गाउँपालिकाका अध्यक्ष परशुराम खतिवडाले पत्रकारलाई धम्की दिएको घटनाप्रति नेपाल पत्रकार महासंघ धादिङ र प्रेस चौतारी नेपाल धादिङले तीव्र विरोध जनाएका छन्।
महासंघ र चौतारीले जारी गरेका विज्ञप्तिहरूमा पत्रकारलाई गाउँ प्रहरी लगाएर प्रमुखको कार्यकक्षमा उपस्थित गराई फोनमार्फत समेत धम्की दिएको घटना निन्दनीय र प्रचलित कानुन तथा प्रेस स्वतन्त्रताको प्रत्यक्ष उल्लङ्घन भएको भन्दै आपत्ति प्रकट गरिएको छ।
गाउँपालिकाको शिक्षा समितिले गरेको निर्णयअनुसार वेबसाइटमा सार्वजनिक गरिएको शिक्षक सरुवाबारे समाचार लेखेका कारण अध्यक्ष खतिवडाले धादिङ न्युज डटकमका प्रधान सम्पादक केशव अधिकारी र बागमती कलम डटकमका सम्पादक अनिल नेपालीलाई धम्की दिएको उल्लेख विज्ञप्तिमा गरिएको छ।
विषयगत सरुवापछि सिद्धलेक–७ को भालडाँडास्थित जाल्पा आधारभूत विद्यालयमा पठनपाठन प्रभावित भएको विषयमा धादिङ न्युज मा “सिद्धलेकका नौवटा विद्यालय बन्द हुने” शीर्षकमा र बागमती कलम मा “सिद्धलेकमा ९ वटा विद्यालय समायोजनः २८ जना शिक्षकको सरुवासँगै विद्यालय वर्गीकरण (विवरणसहित)” शीर्षकमा समाचार प्रकाशित भएका थिए।
समाचारप्रति असन्तुष्टि भएमा खण्डन गर्ने वा प्रेस काउन्सिलमार्फत कानुनी प्रक्रिया अघि बढाउन सकिने प्रावधान हुँदाहुँदै धम्की दिने कार्य प्रेस स्वतन्त्रतामाथिको आक्रमण भएको भन्दै पत्रकार संगठनहरूले अध्यक्ष खतिवडालाई सार्वजनिक माफी माग्न र आगामी दिनमा यस्ता गतिविधि नगर्ने प्रतिबद्धता जनाउन माग गरेका छन्।
