धादिङ, २९ साउन — धादिङ जिल्ला योग खेलकुद संघले आयोजना गरेको तीन दिने निःशुल्क योग खेलकुद प्रशिक्षण आज सम्पन्न भएको छ। नेपाल सरकारको युवा तथा खेलकुद मन्त्रालय अन्तर्गत राष्ट्रिय खेलकुद परिषदमा दर्ता भएको नेपाल योग खेलकुद संघको विधानअनुसार भएको यो प्रशिक्षण साउन २७ देखि २९ गतेसम्म होटल जीविका, पुछारबजारमा सञ्चालन गरिएको थियो।
नीलकण्ठ नगरभित्रका योग साधना केन्द्रका साधक–साधिकासहित विद्यालयका शिक्षक र विद्यार्थीहरूलाई लक्षित तालिममा करिब २०० जना सहभागी भएका थिए। बिहान ४:३० देखि ६:३० बजेसम्म योग साधक–साधिकाहरू र दिउँसो ११:०० देखि २:०० बजेसम्म शिक्षक तथा विद्यार्थीहरूका लागि छुट्टाछुट्टै सत्र सञ्चालन गरिएको थियो।
तालिममा शारीरिक, मानसिक तथा भावनात्मक स्वास्थ्य सुधार, प्राकृतिक उपचार विधि, एकाग्रता र स्मरणशक्ति वृद्धि गर्ने तरिका सिकाइयो। साथै योग खेलकुदमार्फत राष्ट्रिय तथा अन्तर्राष्ट्रिय प्रतियोगितामा सहभागी हुने अवसरबारे जानकारी दिइयो।
प्रमुख प्रशिक्षक प्राकृतिक चिकित्सा विशेषज्ञ तथा अन्तर्राष्ट्रिय योग स्पोर्ट्स जज डा. संग्राम पुरी थिए।
कार्यक्रमको सह आयोजको रुपमा पंतजली योग समिति धादिङ र लायन्स क्लव अफ धादिङ नीलकण्ठ रहेको थियो
