अशोक श्रेष्ठ रुबीभ्याली धादिङ :-धादिङको विकास निर्माणका काममा सामूहिक श्रमदान गर्ने परम्परा अधिकांश गाउँबाट हटिसकेको बेला पनि रुवीभ्यालीका महिलाहरूले यसलाई निरन्तरता दिइरहेका छन्।
[
उनीहरूले स्थानीय विकास निर्माणका कामका लागि निरन्तर श्रमदान गरिरहेका छन्। गाउँका सडक, कुलो, नहर, बाटो मर्मत लगायतका विकासका कार्यमा उनीहरूको उल्लेखनीय सहभागिता रहेको छ। यसरी सहभागी हुनेमा अधिकांश महिला नै हुन्छन्।
आफ्नै गाउँमा भएका विकास निर्माणका काम आफैंले गर्न पाउँदा निकै खुसी लागेको र कुनै-कुनै कामबाट पैसा पनि पाइने भए पनि, पैसाको लागि नभएर विकास निर्माणको काममा सहयोग गरेको एक सहभागीले बताउनुभयो। “घरमा बस्नुभन्दा आफूले जानेको काम गर्दा आफ्नै गाउँको बाटो बन्छ भने किन नगर्ने?” भन्दै बच्चा च्यापेर आराम गर्दै गरेकी एक सहभागीले बताउनुभयो।
गाउँलेहरूले श्रमदान गरेपछि पालिकालाई पनि सजिलो भएको छ। “कसैको व्यक्तिगत फाइदाका लागि नभएर, गाउँको सामूहिक फाइदाका लागि सबैले काम गर्नुपर्छ,” काम गर्दै गरेकी एक स्थानीय दिदीले भनिन्, “बिग्रिएको बाटोमा हिँड्नुभन्दा आफैंले मर्मत गर्नु राम्रो हो।”
यहाँका महिलाहरूले गरेको कामको सकारात्मक पक्षलाई अन्य पालिकाका स्थानीयले सिक्ने हो भने, सानातिना कामका लागि अरूको मुख ताक्ने प्रवृत्ति घट्दै जाने रुवीभ्यालीका गाउँवासीहरूको विश्वास छ।
