झापा माघ २९ ।। पाथीभरमा केबलका निर्माणको विरोधमा उत्रिएको समूह र सरकार बीचको वार्तामा सहमति नजुटेपछि आन्दोलनरत समूहले पुन आन्दोलनका कार्यक्रम घोषणा गरेको छ।
यही शनिबार र आइतबारको वार्ताले कुनै निष्कर्ष निकाल्न नसकेपछि पाथीभरामा निर्माणाधीन केबलकारको विरोधमा उत्रिएको समूहले ललितपुरबाट फेरि आन्दोलन घोषणा गरेको हो ।
केबलकारको विरोध गर्दै आएका मुक्कुमलुङ ताङ्सेःप चुम्भो आवद्ध ११ वटा संस्था र १० वटा अन्तरदलीय राजनीतिक पार्टीले संयुक्त रुपमा आन्दोलन घोषणा गरेका हुन् ।
सोमबार ललितपुरमा पत्रकार सम्मेलन गर्दै उनीहरूले माघ २९ गतेदेखि अर्को चरणको आन्दोलन घोषणा गरेका हुन् ।
उनीहरूले माघ २९ देखि फागुन ९ गतेसम्म ग्लोबल आईएमई बैंकसहित चन्द्र ढकाल नेतृ्त्वको आइएमई समूहलाई बहिष्कार, फागनु ६ गतेदेखि ८ सम्म मुक्कुमलुङ बचाऔँ पदयात्रा, केबलकारको अनुमति तथा सम्झौता खारेजीका लागि दबाब दिन फुङलिङ नगरपालिकाको कार्यालय घेराउ, केबलकार निर्माण सामग्री ढुवानीमा अवरोध तथा काठमाडौं, इटहरी र बिर्तामोडमा विरोध सभा घोषणा गरेका छन् ।
आन्दोलनरत समूहले केबलकारको सम्झौता खारेजीका लागि कोशी प्रदेशका सबै जिल्ला प्रशासन कार्यालयमार्फत् ज्ञापनपत्र बुझाउने कार्यक्रम पनि ल्याएका छन् । त्यहीक्रममा उनलीहरूले विरोध प्रदर्शन कार्यक्रम पनि तय गरेका छन् । यो चरण पूरा भएपछि यसअघि माघ तेस्रो साताको जस्तै अनिश्चितकालीन यातायात बन्द र आमहड्तालको तयारी उनीहरूले गरेका छन् ।
ताप्लेजुङको पाथीभरामा केबलकार बनाउन थालिएपछि विरोधमा उत्रिएका ‘नो केबलकार समूह’का सदस्य र प्रहरीबीच माघ १२ गते झडप हुँदा २४ जना घाइते भएका थिए । जसमा आन्दोलनकारीतर्फ तीनजना गम्भीर घाइते भएका थिए । गोली लागेका दुईजनाको अहिले काठमाडौंमा उपचार जारी छ ।
त्यसपछि आन्दोलनित समूहले कोशी प्रदेशमा आमहड्ताल गर्दा जनजीवन अस्तव्यस्त भएको थियो । जनजीवन प्रभावित भएपछि सरकारले गृहमन्त्रालयका सहसचिव प्रेमप्रसाद भट्टराईको नेतृत्वमा वार्ता टोली बनाएको थियो ।
उक्त वार्टा टोली र आन्दोलितबीच माघ २२ गते ६ बुँदे सहमति भएको थियो । उक्त सहमतिमा सरकारले घोषणा गरे बमोजिम गत माघ १२ गतेको र त्यस आसपास भएका आन्दोलनका क्रममा घाइतेहरूको निःशुल्क र प्रभावकारी उपचार गर्ने उल्लेख थियो ।
माघ १२ गते ताप्लेजुङ सदरमुकाममा सुरक्षाकर्मीसँग भएको घटनाबारे छानबिन गरी कानुनी कारबाही गर्ने सहमति पनि भएको थियो ।
गत माघ २२ गते भएको वार्तामा केबलकारको स्टेशनबारे माघ २७ गतेको वार्तामा विस्तृत छलफल गर्ने सहमति पनि दुई पक्षबीच भएको थियो । तर यसबारेमा शनिबार र आइतबारको वार्तामा कुरा नभएपछि आन्दोलन थाल्न लागिएको हो ।
आन्दोलनकारीहरूले आइबार मात्रै ताप्लेजुङबाट प्रतिनिधिसभाका सदस्य योगेशकुमार भट्टाराईसँग संवाद गरेका थिए । उनीसँग आन्दोलनकारीले गृहमन्त्री रमेश लेखकसँग भेटाइदिन भनेका थिए । भट्टराईले सोमबार गृहमन्त्रीसँग भेटाउने बताए पनि आन्दोलनकारीले नयाँ चरणको आन्दोलन घोषणा गरेका हुन् ।
