अर्जुनधारा । बिर्तामोड नगरपालिकाले चौथो खुदुनाबारी गोल्डकप (अन्तर नगरपालिका स्तरीय खुल्ला नकआउट फुटबल प्रतियोगिता)मा विजयी सुरुआत गरेको छ ।
अर्जुनधारा–३ को कैदले प्राकृतिक रंगशालामा आज भएको उद्घाटन खेलमा अर्जुनधारा नगरपालिकालाई १–० गोल अन्तरले पराजित गर्दै प्रतियोगितामा बिर्तामोड विजयी बनेको हो ।
बिर्तामोडकालागि खेलको दोस्रो हाफको अन्तिम ३ मिनेटमा श्याम मुर्मुले गोल गरे । त्यसपछि दवाबमा परेको अर्जुनधाराले जवाफी गोल फकार्उन नसक्दा हार बेहार्न पुग्यो । खेलमा एक मात्रै गोल गर्न सफल बिर्तामोडका मुर्मु ‘म्यान अफ दि म्याच’ घोषित भए । उनले नगद ५ हजार सहित ट्रफी पुरस्कार पाए ।
उनलाई प्रमुख अतिथि अर्जुनधाराका मेयर बलदेव गोम्देन तामाङ, प्रतियोगिताका संयोजक सिताराम भट्टराई र शनिश्चरे बहुमुखी क्याम्पसका सहायक प्रमुख कृष्ण थापाले पुरस्कार प्रदान गर्नुभएको थियो ।
“हाम्रो शान, हाम्रो अभियान, खुदुनाबारी गोल्डकप हाम्रो पहिचान” भन्ने नारासहित सुरुभएको गोल्डकपलाई अर्जुनधारा नगरपालिकाको १, २ र ३ नम्बर वडाले संयुक्त आयोजना गरेको हो । प्रतियोगिता अन्तरगत भोली हुने दोस्रो खेलमा आयोजक टिमसंग भद्रपुर नगरपालिकाको टिमले प्रतिस्पर्धा गर्ने आयोजक समितिका सचिव खगेन्द्र लिङदेनले जानकारी दिनुभयो ।
प्रतियोगितामा झापाको अर्जुनधारा, बिर्तामोड, भद्रपुर, मेचीनगर, कनकाई, शिवपसताक्षी, गौरादह, दमक नगरपालिका र इलामको माई नगरपालिकाको एक टिमसहित आयोजकको एक टिम गरेर १० टिमको सहभागिता रहेको प्रतियोगिताका खेल संयोजक धनबहादुर तामाङले जानकारी दिनुभयो ।
प्रतियोगिताको विजेताले १ लाख ११ हजार २ सय ११ र उपविजेताले ५५ हजार ६ सय ५५ रुपैयाँ नगदसहित ट्रफी तथा मेडल पुरस्कार पाउने छ । त्यस्तै प्रत्येक खेलको म्यान अफ द म्याचलाई ५ हजार रुपैयाँ पुरस्कार प्रदान गरिने छ भने प्रतियोगिताको बेस्ट स्कोरर, बेष्ट डिफेण्डर, बेष्ट कोच, बेष्ट फरवार्ड, बेष्ट गोलरक्षकले जनही ७ हजार रुपैयाँ पुरस्कार पाउने आयोजकले जनाएको छ ।
चौथों खुदुनाबारी गोल्डकपको उद्घाटन
अर्जुनधारा । खुदुनाबारी गोल्डकपको चौथो संस्करण आजबाट सुरु भएको छ । गोलडकपको चौथो संस्करण अन्तर्गत आजबाट अन्तर नगरपालिका स्तरीय खुल्ला नकआउट फुटबल प्रतियोगिता सुरु भएको हो ।
अर्जुनधारा–३ को कैदले प्राकृतिक रंगशालामा संचालन सुरु भएको गोल्डकपको प्रमुख अतिथि अर्जुनधारा नगरपालिकाका मेयर बलदेबसिंह गोम्देनले उद्घाटन गर्नुभयो । मुख्य रेफ्रीलाई उद्घाटन खेलकालागि बल हस्तनान्तरण गर्दै गोम्देनले प्रतियोगिताको उद्घाटन गर्नुभएको थियो । उद्घाटन समारोहकी बिशेष अतिथि बिर्तामोड नगरपालिकाकी नगरप्रमुख पवित्रा महत्तरा प्रसाईले पानसमा दिप प्रज्वलन गर्नुभएको थियो ।
“हाम्रो शान, हाम्रो अभियान, खुदुनाबारी गोल्डकप हाम्रो पहिचान” भन्ने नारासहित सुरुभएको गोल्डकपलाई अर्जुनधारा नगरपालिकाको १, २ र ३ नम्बर वडाले संयुक्त आयोजना गरेको हो । प्रतियोगिता संयोजक तथा अर्जुनधारा नगरपालिका वडा नम्बर ३ का वडाअध्यक्ष सिताराम भट्टराईको अध्यक्षतामा भएको उद्घाटन समारोहमा अर्जुनधारा नगरपालिका वडा नम्बर १ का अध्यक्ष उपेन्द्र बस्नेतले स्वागत गर्नुभएको थियो ।
उद्घाटन समारोहमा संयोजक भट्टराईले खुदुनाबारीको इतिहाससहित गोल्डकप आयोजनालाई समेटेर तयार पारिएको प्रतिवेदन प्रस्तुत गर्नुभएको थियो । कैदले प्राकृतिक रङशालाको स्तरउन्नती, युवा पुस्ताहरुलाई खेलक्षेत्रमा प्रोत्साहन दिई व्यवसायिक खेलाडीको रुपमा उत्पादन गर्ने, नगरपालिका नगरपालिका बिचको भाइचारा सम्बन्ध बढाउने र कैदेले पर्यापर्यटन क्षेत्रको दिगो बिकासको लागि बढावा दिने, राष्ट्रका लागि खेलकुद स्वास्थ्यको लागि खेलकुद नाराका साथ खुदुनाबारी गोल्डकपलाई निरन्तरता दिदै सभ्य र स्वास्थ्य समाज निर्माण गर्ने लगायतका उदेश्यहरु राखेर प्रतियोगिता आयोजना गरिएको उहाँको भनाई छ ।
अर्जुनधारा नगरपालिकाका ११ वटै वडाका जनप्रतिनिधि सहित विभिन्नसंघसंस्थाका प्रतिनिधिहरुको बाक्लो उपस्तिथि रहेको उद्घाटन समारोहमा बिर्तामोड नगरपालिका र अर्जुनधारा नगरपालिकाका मेयरले शुभकामना मन्तव्य राख्नुभएको थियो ।
