काठमाडौं ।। साफ महिला च्याम्पियनसिप २०२४ अन्तर्गत समूहको दोस्रो खेलमा नेपालले माल्दिभ्समाथि फराकिलो जित दर्ता गरेको छ ।
दशरथ रंगशालामा सोमबार सम्पन्न खेलमा माल्दिभ्समाथि ११-० को फराकिलो जितका साथ नेपाल अंक तालिकाको शीर्षस्थानमा पनि उक्लिएको छ । पहिलो हाफमा ४ गोल गरेको नेपालले दोस्रो हाफमा ७ गोल थपेको थियो । नेपालको जितमा रेखा पौडेलले ५ गोल र प्रिती राईले ह्याट्रिक पूरा गर्दा सविता राना मगर, अमिशा कार्की र अनिता केसीले १-१ गोल गरे ।
नेपालको २ खेलमा ४ अंक छ । भुटानको समान ४ अंक भएपनि गोल अन्तरमा नेपाल अघि छ । श्रीलंकाको ३ अंक हुँदा माल्दिभ्सले खाता खोलेको छैन । अब अन्तिम खेलमा नेपालले बराबरी गरे मात्र पनि सेमिफाइनलमा प्रवेश गर्नेछ । समूह विजेता बन्न भने भुटानको नतिजा पर्खनुपर्नेछ ।
खेलको सातौं मिनेटमा नेपालले प्रितीको गोलमा अग्रता लियो । सविता राना मगरले दिएको छोटो कर्नरमा प्रितीले गरेको फितलो प्रहार माल्दिभ्सका २ डिफेन्डर र गोलरक्षकलाई छिचोल्दै निअर पोस्टबाट गोल भएको थियो ।
२४ औं मिनेटमा नेपालको गोलमा गोलरक्षक अमिनाथ लिजा बाधक बनिन् । रेखाको क्रसमा रश्मी कुमारी घिसिङले ६ यार्ड बक्स भित्रबाट गरेको शक्तिशाली हेडर अमिनाथले विफल परिन् ।
२९ औं मिनेटमा सविताले नेपालको अग्रता दोब्बर पारिन् । पेनाल्टी क्षेत्रबाहिर सरुको पासलाई नियन्त्रणमा लिँदै सविताले गरेको प्रहार गोलमा परिणत भएको थियो ।
३२ औं मिनेटमा रेखाले नेपाललाई ३-० ले अघि बढाइन् । रश्मीले दिएको पासलाई रेखाले गोललाइनको ठिक अघिबाट छातीले गोल गरिन् । लगत्तै रश्मीले पेनाल्टी क्षेत्र भित्रबाट गरेको लगातार दुई प्रहारले पोस्टको दिशा लिएन ।
दोस्रो हाफको दुई मिनेट नबित्दै रेखाले ह्याट्रिक पूरा गरिन् । ६ यार्ड बक्सभित्र रेखाकै पास डिफेन्डरलाई लागेर फर्केपछि उनले रिबाउन्डलाई गोलमा परिणत गरिन् ।
६० औं मिनेटमा सविताले अर्को गोल थप्ने अवसर सदुपयोग गर्न सकिनन् । पेनाल्टी क्षेत्र बाहिरबाट प्रितीको प्रहार गोलरक्षक अमिनाथले रोकेपछि आएको रिबाउन्डलाई सविताले पोस्टको दिशा दिन सकिनन् ।
६३ औं मिनेटमा रेखाले व्यक्तिगत चौथो गोल गरिन् । सरुले दिएको पासलाई रेखाले नियन्त्रणमा लिँदै वन भर्सेस वनमा सुन्दर फिनिस गरिन् । लगत्तै प्रितीले नेपालको लागि सातौं गोल थपिन् । पेनाल्टी क्षेत्र बाहिर रेखाले दिएको पासलाई प्रितीले पहिलो टचमै टप कर्नरमा फिनिस गरिन् ।
७८ औं मिनेटमा रेखाले व्यक्तिगत पाँचौ र समग्रमा नवौं गोल गरिन् । अनिता केसीको पासलाई पेनाल्टी क्षेत्र भित्रबाट उनले गोल गरिन् । ८६ औं मिनेटमा नेपालले पेनाल्टीको अवसर पायो । प्रितीले पेनाल्टीलाई गोलमा परिणत गर्दै १०-० को अग्रता दिलाइन् ।
त्यसको एक मिनेट नबित्दै अमिषा कार्कीले अर्को गोल गरिन् । सविताको पास डिफेन्डरलाई लागेर फर्केपछि अमिशाले गोलरक्षकलाई बिट गर्न सफल रहिन् ।
साफ अन्तर्गत बुधबार भारत र बंगलादेश साँझ ५:३० बजे खेल्नेछन् । समूह बी अन्तर्गत विहीबार दिउँसो १:३० बजे भुटान र माल्दिभ्स तथा साँझ ५:३० बजे नेपाल र श्रीलंका खेल्नेछन् ।
