भारतमा लगातार दोस्रो दिन पनि पछिल्लो २४ घण्टामा ६२ हजारभन्दा बढी कोरोना संक्रमित भेटिएका छन् ।
अघिल्लो दिन भारतमा ६२ हजार ६ सय ३२ नयाँ संक्रमित भेटिएका थिए ।
यो पछिल्लो १६४ दिनको सबैभन्दा धेरै हो ।
यसअघि १५ अक्टोबरमा ६३ हजार ४ सय ४१ संक्रमित भेटिएका थिए ।
यता कोरोनाका बढ्दो संक्रमणका बीच आज मध्यप्रदेशका १२ शहरमा लकडाउन गरिएको छ ।
यहाँ शनिबार राती १० बजेदेखि सोमबार बिहान ६ बजेसम्म ३२ घण्टाको लकडाउन रहनेछ ।
त्यस्तै महाराष्टमा पनि आजदेखि रात्रिकालीन कर्फ्यू लगाइएको छ । रात्रिकालीन कर्फ्यू अप्रिल १५ सम्म रहने भारतीय संचार माध्यमहरुले जनाएका छन् ।
उता ब्राजिलमा पनि कोरोना संक्रमण तीव्र बनेको छ ।
पछिल्लो २४ घण्टामा मात्रै ब्राजिलमा थप ८५ हजार ९ सय ४८ जनामा कोरोना संक्रमण पुष्टि भएको छ ।
समाचार संस्था रोयटर्सका अनुसार ब्राजिलमा पछिल्लो २४ घण्टामा मात्रै ३ हजार ४ सय ३८ जनाको मृत्यु भएको छ ।
योसँगै ब्राजिलमा कोरोना संक्रमितको संख्या १ करोड २४ लाख ९० हजार नाघेको छ ।
त्यस्तै ब्राजिलमा कोरोनाले मृत्यु हुनेको संख्या ३ लाख १० हजारभन्दा बढी नाघेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |