महोत्तरीको बर्दिवास नगरपालिकाले एक आर्थिक वर्षमा करिब १६ करोड रकम सामाजिक सुरक्षा कार्यक्रमअन्तर्गत वितरण गरेको छ । गत आर्थिक वर्ष २०७६/७७ मा यस कार्यक्रमअन्तर्गत १५ करोड ९६ लाख ९५ हजार रकम वितरण गरिएको नगर कार्यपालिकाको कार्यालयले जनाएको हो ।
नगर क्षेत्रभित्रका दुई हजार ६०३ ज्येष्ठ नागरिक (७० वर्षमाथिका) यो कार्यक्रमबाट लाभान्वित छन् । ज्येष्ठ नागरिकमा कूल नौ करोड ८० हजार छ सय प्रवाह भएको कार्यालय प्रमुख तथा प्रमुख प्रशासकीय अधिकृत रेवतीप्रसाद पराजुलीले जानकारी दिए ।
त्यसैगरी नगर क्षेत्रका एक हजार चार सय ४९ एकल महिलालाई तीन करोड ४९ लाख ६० हजार वितरण गरिएको छ । सामाजिक सुरक्षा कार्यक्रमअन्तर्गत नगर क्षेत्रका सात सय २६ बालबालिकामा दुई करोड १२ लाख ३६ हजार र पाँच सय ४३ अपाङ्गता भएकाहरुमा एक करोड २४ लाख १८ हजार चार सय भत्ता वितरण गरिएको कार्यालयले सार्वजनिक गरेको हो ।
यसअघिका वर्षमा सेवाग्राहीलाई घरघरै रकम पुर्याइने गरिए पनि अब सबैलाई अनिवार्य बैङ्क खातामा रकम पठाउने व्यवस्था गरिएको कार्यालयले जनाएको छ । सामाजिक सुरक्षा भत्ता कार्यक्रमको सार्वजनिक सुनुवाइ कार्यक्रम गरेर सेवाबारे छलफल गरिँदै आइएको प्रमुख प्रशासकीय अधिकृत पराजुलीले स्पष्ट पारे । यता सेवाग्राही वृद्धवृद्धाले भने बैङ्कले समयमा सुरक्षा भत्ता नदिएको गुनासो गरेका छन् ।
‘गरिबी न्यूनीकरण, बिरामी हुँदा उपचार गराउन, विपद्को अवस्थामा उत्पन्न जोखिम न्यूनीकरण गर्न सामाजिक सुरक्षा कार्यक्रमले सहयोग पुर्याउँछ,’ पराजुलीले भने, ‘बैङ्कमा रकम जम्मा गरिँदा हराउने र अनावश्यक खर्च हुनबाट जोगाउने भएको हुँदा यो व्यवस्था अपनाइएको हो ।’
सेवाग्राहीलाई रकम प्राप्त गर्न सजिलो बनाउन सम्बन्धित बैङ्कलाई सेवा प्रवाहको मासिक दिन तालिका बनाएर समयसमेत निर्धारण गर्न आग्रह गरिएको पराजुलीको भनाइ छ । यसैगरी सेवाग्राहीको सङ्ख्या अद्यावधिक गर्न सम्बन्धित वडा कार्यालयले काम गर्दै आएको कार्यालयले जनाएको छ । रासस
