सिन्धुलीका ३९ माध्यमिक विद्यालय सहित १ सय ४२ वटा सामुदायिक विद्यालयमा शिक्षकको दरबन्दी शुन्य रहेको पाइएको छ ।
यहाँका ३९ माध्यमिक, ८२ वटा निम्नमाध्यमिक र २१ वटा प्राथमिक गरी कुल १ सय ४२ वटा विद्यालयमा कुनै पनि तहका शिक्षक दरबन्दीको नभएको पाइएको हो ।
सरकारले माध्यमिक तहमा कम्तीमा ७, निम्नमाध्यमिक तहमा चार र प्राथमिक तहमा ३ जना शिक्षकको दरबन्दीको तोकेको छ । एउटै कक्षामा विद्यार्थी संख्याका आधारमा ४५ जनाभन्दा बढी विद्यार्थी भए थप शिक्षकको व्यवस्था गर्ने नीति छ ।
तर यहाँ आधारभुत तहकै २१ वटा विद्यालय शिक्षक दरबन्दी बिहिन हुँदा पठनपाठनमा समस्या हुने गरेको शिक्षा विकास तथा समन्वय इकाई सिन्धुलीका प्रमुख नेत्रप्रसाद गजुरेलले बताए । जिल्लामा प्राथमिक तहका ३ सय ६६, निम्नमाध्यमिक तहको ८१ र माध्यमिक तहको १ सय २० वटा गरी जम्मा ५ सय ६७ वटा सामुदायिक विद्यालयहरु रहेका छन् । ‘तीमध्ये १ सय ४२ ओटा सामुदायिक विद्यालयमा स्थापनाकालदेखिनै राहत, अस्थायी र स्थायी कुनैपनि किसिमको दरबन्दी व्यवस्थापन हुनै सकेको छैन,’ गजुरेलले भने ।
यस्ता विद्यालयहरुमा झण्डै २५ हजार छात्र तथा छात्राहरु अध्ययन गर्दै आएका छन् । उनीहरुलाई तल्लो तह वा निजी श्रोतमा राखिएका शिक्षकहरुले पठनपाठन गराउने गरेका छन् । ‘सरकारले तोकेअनसारको शिक्षक दरबन्दी दिन नसकेपछि अभिभावहरुले निजी श्रोतमा राखिएका शिक्षक र तल्लो तहका शिक्षकहरुले माथिल्लो कक्षामा पढाउनु पर्ने बाध्यता रहेको छ,’ उनले थपे ।
जिल्लामा कक्षा १ देखि १२ सम्म ७९ हजार १ सय ३३ जना विद्यार्थीहरु अध्ययनरत छन् । विद्यार्थी संख्याका आधारमा जिल्लामा प्राथमिक तहमा शिक्षक विद्यार्थी अनुपात २४ प्रतिसत मात्र रहेको छ । निमाविमा ६८ र माविमा ४५ प्रतिस रहेको छ । दरबन्दी शिक्षक नभएका विद्यालयमा निजी स्तरमा राखिएका शिक्षकहरुका साथै प्रावितहकाले निमाविसम्म र निमावि तहकाले कक्षा १२ सम्मका विद्यार्थीहरु पठनपाढन गराउनु पर्ने बाध्यता रहेको गजुरेलेको भनाइ छ ।
कतिपय स्थानीय तहले अनुदान दिएर पनि विद्यालय संचालन गर्नु परेको छ । पछिल्लो समय विद्यार्थी संख्या कम भएका विद्यालयहरु मर्जगर्दा समेत दरबन्दीको व्यवस्थापन हुन सकेको छैन । जिल्लामा हाल राहत समेतगरी १ हजार ६ सय ३२ जना प्रावि, ३ सय २६ जना निमावि, २ सय ६७ जना मावि र साविक उच्चमाविका अनुदान समेत गरी १ सय २८ जनाको दरबन्दी रहेको छ ।