महिलाले नेतृत्व गरेको देशको एकमात्र महानगरपालिका भरतपुरमा फेरि पनि महिला नेतृत्वकै लागि जोड दिन थालिएको छ । सो महानगरपालिकाको प्रमुख र उपप्रमुख दुवै महिला हुन् । भरतपुर महानगरपालिकाको प्रमुखमा माओवादी केन्द्रकी रेणु दाहाल र उपप्रमुखमा नेपाली काँग्रेसकी पार्वती शाह ठकुरी छिन् ।
उपप्रमुख पार्वती शाह ठकुरी आगामी निर्वाचनमा पार्टीले महिलालाई नै नेतृत्वमा पठाउनुपर्ने बताउँछिन् । महिलाले पनि पुरुषसरह काम गर्न सक्ने भएकाले महिलालाई पालिका हाँक्ने अवसर दिनुपर्ने उनको भनाइ छ ।
भरतपुर महानगरको प्रमुख र उपप्रमुख दुवै पद महिलाले नै जितेर सफलतापूर्वक काम गर्दै आएकाले पनि महिलाको नेतृत्व क्षमता प्रस्ट भइसकेको ठकुरी बताउँछिन् । २०७४ सालमा सम्पन्न स्थानीय तहको निर्वाचनमा ठकुरीले नेकपा एमालेकी दिव्या शर्मालाई पराजित गरेकी हुन् । उनले ४७ हजार १९७ मत हासिल गर्दा शर्माले ३९ हजार ५२५ मत पाएकी थिइन् ।
उपप्रमुख ठकुरीले गठबन्धनबाट नगरप्रमुख पदमा जितेकी माओवादी केन्द्रकी रेणु दाहालको तुलनामा ४ हजार ७० मत बढी प्राप्त गरेकी थिइन् । मेयर दाहालले ४३ हजार १२७ मत पाएकी थिइन् ।
पाँच वर्ष पालिकाको अनुभव बटुलेकी उपप्रमुख ठकुरीले भरतपुर महानगर प्रमुखमा आफ्नो दाबी गरेकी छन् । उनले आगामी निर्वाचनमा काँग्रेसबाट आफूले नै भरतपुर महानगर प्रमुखको उम्मेदवारी पाउने विश्वास व्यक्त गरिन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |