मानसिक सन्तुलन गुमाएकी युवतीको बलात्कार पछि हत्या गरेको आशंकामा उदयपुरका एक युवक पक्राउ

मानसिक सन्तुलन गुमाएकी अन्दाजी २६ वर्षीया युवतीको बलात्कार पछि हत्या गरेको आशंकामा प्रहरीले उदयपुरका एक युवकलाई पक्राउ गरेको छ ।

बैशाख ३ गते रौतामाई गाउँपालिका ७ स्थित नवज्योती सामुदायिक वनको हिले खोल्सीमा भेटिएको मानव कंकालको अनुसन्धानबाट बलात्कारपछि हत्या भएको रहस्य खुलेको हो ।

प्रहरीले घटनामा संलग्न रहेको आशंकामा स्थानीय २४ वर्षीय राजु आछामेलाई शनिबार पक्राउ गरी आइतबार सार्वजानिक गरेको हो । तराइ मूलका जस्तो देखिने ती युवतीलाई आछामेले बलात्कारपछि ढुङगाले टाउकोमा हानेर हत्या गरेको स्वीकार गरेको जिल्ला प्रहरी कार्यालयका एसपी भीमबहादुर दाहालले बताए ।

गत चैत ११ गते आछामेले मानसिक सन्तुलन गुमाएकी ती युवतीलाई बेलुकी ६ वजे जबर्जस्ती हातमा समातेर जंगलतर्फ तान्दै लगेर बलात्कार गरी हत्या गरेको प्रारम्भिक वयानबाट खुलेको उनले बताए ।

पछिल्लो एक महिनायता ती युवती उक्त क्षेत्रमा मागेर हिँड्ने गरेको स्थानीय होमबहादुर बस्नेतले बताए । घाँस, दाउरा लिन जाने महिलाहरुले जंगलको खोल्सीमा चुरा, पोते सहितको मानव कंकाल देखेपछि प्रहरीलाई खवर गरेका थिए ।

कंकाल फेला परेलगत्तै प्रहरीले तत्काल अनुसन्धान सुरु गरेको थियो । अनुसन्धानका क्रममा घटनाको दिन आछामेसँगै ती युवती रहेको खुलेपछि उनलाई पक्राउ गरी सोधपुछ गर्दा हत्याको रहस्य खुलेको एसपी दाहालले बताए । प्रहरीले घटनास्थलबाट हत्यामा प्रयोग गरिएको ढुङगा र आरोपितले लगाएको टोपीसमेत बरामद गरेको जनाएको छ ।