प्रदेश १ को प्रदेशसभा बैठक वैशाख ५ गतेसम्मका लागि स्थगित भएको छ । सोमबार बसेको बैठकमा प्रतिपक्षी दलहरूले अवरोध गरेपछि बैठक ५ गतेसम्मका लागि स्थगित भएको हो ।
प्रदेश १ को जारी सातौं हिउँदे अधिवेशनमा चालु वर्षका लागि स्वीकृत कार्यक्रमहरू सुचारू गर्नुपर्ने, विकास आयोजनालाई निरन्तरता दिनुपर्ने, अलपत्र रहेका बहुवर्षे विकास आयोजनाको काम सुचारु गर्नुपर्ने मागसहित प्रतिपक्षी दल नेपाली काङ्ग्रेस, माओवादी केन्द्र र जनता समाजवादी पार्टीले बैठक अवरुद्ध गर्दै आएका छन् ।
समस्या सामधानका लागि आइतबार सभामुख प्रदीपकुमार भण्डारीले बैठक बोलाएका थिए । तर मुख्यमन्त्री शेरधन राई बैठकमा नगएपछि छलफल निष्कर्षविहीन भएको थियो । आइतबार बिहान मुख्यमन्त्री शेरधन राईले बैठक बोलाएका थिए । तर मुख्यमन्त्रीले माग सम्बोधन गर्न सहमत नभएपछि प्रतिपक्षी दलहरूले सरकारलाई जिम्मेवार बनाउन संसदमा अवरोध गरेको जनता समाजवादी पार्टी प्रदेश १ संसदीय दलका नेता जयराम यादवले जानकारी दिए ।गत माघ ७ गतेबाट प्रदेश १ को सातौं हिउँदे अधिवेशन सुरु भएको थियो । सत्ता पक्षकै कारण तीन महिनामा सातवटा मात्रै बैठक बसेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |