बार्सिलोनाका फरवार्ड एन्टोइन ग्रिजम्यान तेस्रो सन्तानका पिता बनेका छन् । बिहीबार अर्थात् आठ अप्रिलमा उनी तेस्रो सन्तान अल्बा ग्रिजम्यानको अभिभावक बनेका हुन् ।
सामाजिक सञ्जालमार्फत् बिहीबार बिहान १०ः२४ बजे आफ्नो तेस्रो सन्तानका रूपमा अल्बा ग्रिजम्यान जन्मिएको जनाएका हुन् । यसअघि उनका एक छोरी र एक छोरा थिए । उनीहरू दुवै पनि आठ अप्रिलमै जन्मिएका हुन् ।
छोरी मिया पाँच वर्षकी भइन् । मिया जन्मेका तीन वर्षपछि अमारो जन्मिए भने त्यसको दुई वर्षपछि इरिका चोपेरेना र ग्रिजम्यानले तेस्रो स्थानका रूपमा अल्बा जन्मिएका हुन् । उनीहरू तीनै जनाको जन्मदिन एकै दिन पर्छ ।
बिहीबार अल्बा जन्मिएपछि उनले सो दिन भएको बार्सिलोनाको सामूहिक प्रशिक्षण गुमाएका थिए । अब आजबाट उनी प्रशिक्षण मैदान फर्किने बार्सिलोनाले जनाएको छ ।
बार्सिलोना रियल मड्रिडविरुद्धको खेलका लागि तयारीमा छ । शनिबार बार्सिलोना र रियलले प्रतिष्ठाको लडाइँ मानिने एल क्लासिको खेल्दैछन् । रियल मड्रिडको प्रशिक्षण मैदान स्टेडियो अल्फ्रेडो डी स्टेफानोमा हुने खेलमा दुवै टोली ला लिगाको उपाधि होडमा अब्बलता प्रस्तुत गर्ने दाउमा हुनेछन् ।
यस खेलमा बार्सिलोनाले जित निकालेमा वा बराबरीमा रोकिएको खण्डमा पनि शीर्ष स्थान कब्जा गर्नेछ । हाल ऊ ६५ अङ्कसहित दोस्रो स्थानमा छ । शीर्ष स्थानको एथ्लेटिको मड्रिडसँग ६६ अङ्क छ ।
यता, रियललाई भने शीर्ष स्थानमा उक्लिन बार्सिलोनाविरुद्ध फराकिलो जित आवश्यक छ । उसले बार्सिलोनालाई जितेमा पनि एथ्लेटिकोसँग अङ्क बराबरी गर्नेछ । गोलान्तरको आधारमा ऊ पछाडि नै रहनेछ । अहिले रियल ६३ अङ्कसहित तेस्रो स्थानमा छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |