२६ चैत, काठमाडौं । इटालियन सिरी ए मा साविक विजेता युभेन्ट्स नापोलीलाई पराजित गर्दै तेस्रो स्थानमा उक्लेको छ ।
बुधबार राति भएको खेलमा क्रिस्टियानो रोनाल्डो र पाउलो डिबलले गोल गरेपछि युभेन्ट्सले नापोलीलाई २-१ ले पराजित गरेको हो ।घरेलु मैदानमा खेलको १३ औं मिनेटमा रोनाल्डोले गोल गर्दै युभेन्ट्सलाई अग्रता दिलाएका थिए । पहिलो हाफमा युभेन्ट्सले अग्रता कायमै राख्यो । ७३ औं मिनेटमा डिबलाले गोल गर्दै युभेन्ट्सको अग्रता दोब्बर पारे ।
इन्जुरी टाइममा नापोलीका लागि इनसिग्ने लोरेन्जोले पेनाल्टीमा एक गोल फर्काए ।जितपछि २९ खेलबाट ५९ अंक जोड्दै युभेन्ट्स तेस्रो स्थानमा उक्लेको छ । युभेन्ट्स अझै शीर्ष स्थानको इन्टरभन्दा १२ अंकले पछि छ । २९ खेलबाट ५८ अंक रहेको एटलान्टा चौथो स्थानमा झरेको छ । समान खेलबाट ५६ अंकसहित नापोली पाँचौ स्थानमै छ ।
शीर्ष स्थानको इन्टरले ससुलोलाई २-१ ले पराजित गर्दै दोस्रो स्थानको एसी मिलानमाथि ११ अंकको अग्रता बनाएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |