तनाव या मानसिक चिन्ताको कारण पनि कपाल झर्ने गर्छ

वंशाणुगत कारण, शरीरमा पोषणको कमी, प्रदूषण, खराब खानपान, अत्यधिक केमिलक भएको सामग्रीको प्रयोगका कारण धेरै मानिसहरूलाई कपाल झर्ने समस्याले निकै सताइरहेको हुन्छ ।

हालैको एक अनुसन्धानले पत्ता लगाएअनुसार तनाव या मानसिक चिन्ताको कारण कपाल पनि झर्ने गर्छ । आजकलको व्यस्त जीवनमा मानिसहरूसँग खाने र सुत्ने समय हुँदैन । घरपरिवार, सम्बन्ध, कार्यालय, काम, पढाइलगायतका अन्य धेरै कारणले तनावलाई जन्म दिन्छ । हार्बर्ड विश्वविद्यालयका अन्वेषकहरूका अनुसार तनावले अणुहरूलाई असर गर्छ, जसका कारण कपाल झर्न थाल्छ ।

तनावले कपाल झार्नुका साथै उक्त ठाउँमा नयाँ कपालको वृद्धि पनि हुन दिँदैन । तनावका कारण कपाल झरिरहेको छ भने एक मानिस चाँडै टक्लु बन्न सक्छ । तनावका कारण स्टेम सेललाई सक्रिय हुन समय लाग्छ । र, तनावको कारण सेलमा आएको अचानक परिवर्तनले कपालको फोलिकललाई असर गर्ने हार्बर्ड विश्वविद्यालयका अन्वेषकहरूले पत्ता लगाएका हुन् ।

कपाल झर्ने समस्यालाई गहिरिएर बुझ्नका लागि मुसामा अध्ययन गरिएको थियो । मुसामा शल्यक्रिया गरेर तनाव हार्मोन कोर्टिकोस्टेरन उत्पादन गर्ने एड्रेनल ग्रन्थी हटाइएको थियो । अध्ययनको क्रममा मुसामा कपालको वृद्धि भएको देखियो । तर, मुसालाई कोर्टिकोस्टेरनको केही डोज दिँदा कपालको वृद्धिमा कमी आएको पाइयो ।

त्यस्तै, दोस्रो अध्ययनमा केही स्वस्थ मुसालाई नौ हप्तासम्म कोर्टिकोस्टेरनको डोज दिइएको थियो । केही समयपछि ती मुसाहरूमा कपालको विकास पूर्णरूपमा बन्द भएको पाइयो । कपालको फोलिकलमुनि पर्मल प्यापलिया कोष हुन्छ, जसमा तनाव हार्मोन टाँसिन जान्छ । यसका कारण कपालको वृद्धि पूर्णरूपमा बन्द हुन्छ ।