नेपाली काङ्ग्रेसको ऐतिहासिक जिम्मेवारी र भूमिका छ ,हाम्रो पार्टी कहिल्यै सङ्कटमा छैन : शेरबहादुर देउवा

नेपाली काङ्ग्रेसका सभापति शेरबहादुर देउवाले नेता नवीन्द्रराज जोशीको निधनले काङ्ग्रेसले पार्टीको नेतृत्व गर्न सक्ने क्षमता भएका नेता गुमाएको बताएका छन् ।स्वर्गीय नवीन्द्रराज जोशीको निधन भएको १३औँ दिनको पुण्यतिथिमा पार्टी कार्यालय सानेपामा आयोजित श्रद्धाञ्जलीसभामा बोल्दै सभापति देउवाले स्वर्गीय जोशीले पार्टी र सरकारमा मन्त्री हुँदा गरेको काम उदाहरणीय रहेको बताए ।

उनले स्वर्गीय नेता जोशीमा पार्टीको नेतृत्व गर्न सक्ने क्षमता भएको र उनको निधनले पार्टीले पार्टी हाक्ने नेता गुमाउनुपरेको बताए ।फरक प्रसङ्गमा पार्टी सभापति देउवाले पार्टीभित्र कुनै किसिमको विवाद नरहेको पनि स्पष्ट पारे । नेताहरूले पार्टी सङ्कटमा रहेको भन्दै विभिन्न सार्वजनिक कार्यक्रमहरूमा बोलेको विषयलाई खण्डन गर्दे सभापति देउवाले पार्टी कहिले पनि सङ्कटमा नरहेको ठोकुवा गरे । उनले पार्टीका नेता कार्यकर्तालाई आफैँले आफैँलाई कमजोर नबनाउन पनि आग्रह गरे ।

‘यहाँ दोहोरी खेल्ने कुरा छैन । नेपाली काङ्ग्रेस सङ्कटमा हिजो पनि थिएन । आज पनि छैन । भोलि पनि रहँदैन,’ सभापति देउवाको भनाइ थियो, ‘नेपाली काङ्ग्रेसको ऐतिहासिक जिम्मेवारी र भूमिका छ । यसलाई सबैले निभाउँदै गएका छौँ । त्यसैले आफैँले आफैँलाई कमजोर गर्ने काम नगरौँ । हाम्रो पार्टी कहिल्यै सङ्कटमा छैन ।’

कार्यक्रममा वरिष्ठ नेता रामचन्द्र पौडेलले स्वर्गीय जोशीको असामयिक निधनले पार्टीमा अपूरणीय क्षति पुगेको बताए । उनले स्वर्गीय जोशीले थाल्नुभएका कामलाई सबै मिलेर सम्पन्न गर्नुपर्नेमा पनि बताए ।