पाँचौं संस्करणको आरबिबी एनभिए राष्ट्रिय महिला तथा पुरुष क्लब लिग भलिबल च्याम्पियनसिप अन्तर्गत सोमबारका महिलातर्फका खेलमा भरतपुर मेट्रो खेलकुद परिषद् र विभागीय टोली नेपाल एपिएफ क्लबले जित दर्ता गरेका छन् ।
त्रिपुरेश्वरस्थित राष्ट्रिय खेलकुद परिषदको कर्भडहलमा सोमबार भएको खेलमा एपीएफले त्रिभुवन आर्मीलाई ३–१ को सेटमा पराजित गरेको हो ।
आर्मीविरुद्ध पहिलो सेट गुमाएको एपीएफले त्यसपछि लगातार ३ सेट जितेर अंक जोडेको हो । जितसँगै एपीएफले ३ खेलमा ७ अंक जोडेको छ । आर्मीको यो पहिलो हार हो । आर्मीले ४ खेलमा ८ अंक जोडेको छ ।
सोमबार नै भएको खेलमा भरतपुर मेट्रो खेलकुद परिषदले ढोरपाटन स्पोर्ट्स क्लबलाई ३–० को सेटमा पराजित गर्दै पहिलो जित निकालेको छ ।
पहिलो जित निकाल्ने क्रममा भरतपुरले ढोरपाटनमाथि २५–२१ , २५–१२ र २५–१३ को सेटमा हरायो । यो प्रतियोगितामा पुरुषतर्फ ७ र महिलातर्फ ६ टोलीले प्रतिस्पर्धा गरिरहेका छन् । लिगको शीर्ष दुई टिमले उपाधिका लागि खेल्ने छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |