माओवादी केन्द्रले प्रदेश १ का आर्थिक मामिला तथा योजनामन्त्री टंक आङ्बुहाङलाई सांसद पद र साधारण सदस्यबाट समेत हटाएको छ ।
आङबोहाङलाई दलको विधान विपरीत गतिविधि गर्दै एमालेमा लागेको भन्दै माओवादी केन्द्रले कारबाही गरेको हो ।
सांसदबाट हटाएको जानकारी आजै प्रदेशसभालाई जानकारी दिने माओवादी केन्द्रको तयारी छ ।
दल त्याग गर्दै वर्तमान प्रदेश सरकारको आर्थिक मामिला तथा योजना मन्त्री बनेका आङ्बुहाङलाई चैत १७ गते माओवादी केन्द्र प्रदेश १ संसदीय दलले २४ घण्टे स्पष्टीकरण सोधेको थियो ।
तर उहाँले स्पष्टीकरण नबुझाएपछि पार्टीले पदमुक्त गरेको हो ।
त्यस्तै माओवादीले एमालेतिर लागेका प्रदेश १ का टंक आङ्बोहाङसहित लुम्बिनीका दधिराम न्यौपाने र दिनेश पन्थी तथा कर्णालीका धर्मराज रेग्मीलाई प्रदेशसभा सदस्यबाट हटाउन लागेको छ ।
माओवादीले पार्टी परिवर्तन गरेका लुम्बिनीका दुई प्रदेशसभा सदस्यलाई पदमुक्त गराउन प्रदेशसभा सचिवालयमा सिफारिस गरेको छ ।
एमाले प्रवेश गरेका रूपन्देहीका न्यौपाने र गुल्मीका पन्थीलाई हटाउन माओवादी केन्द्रको संसदीय दलले सिफारिस गरेको हो ।
अहिले दुवैलाई एमाले अध्यक्ष केपी शर्मा ओलीले केन्द्रीय सदस्य बनाउनु भएको छ ।
राजनीतिक दलसम्बन्धी ऐनअनुसार कुनै सांसद वा प्रदेशसभा सदस्यले दल त्याग गरेर अर्को दलको सदस्यता लिएमा पद रिक्त हुने व्यवस्था छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |