कोरोनाको नयाँ भेरिएन्टले मुसामा समेत सङ्क्रमण गराउन सक्ने, धेरै प्रजातिका जनावरमा भाइरस फैलन सक्ने गुण बढ्यो

कोरोना भाइरसले चमेरो, मानिस, बाँदरका प्रजाति, बिरालोलगायतमा सङ्क्रमण गराउन सक्ने यसअघि नै पुष्टि भएको थियो ।तर, कोरोना भाइरसले मुसामा पनि सङ्क्रमण गराउन सक्ने हालै गरिएको एक अध्ययनले देखाएको छ ।

मुसामा समेत हुनसक्ने सङ्क्रमणले मानिसमा खासै असर भने पर्ने देखिएको छैन । तर, भाइरसको नयाँ भेरिएन्टले धेरै प्रजातिका जनावरमा भाइरस फैलन सक्ने गुण बढाएको छ । भाइरसमा भइरहेको म्युटेसनले उनीहरूमा छिटो र धेरै परिवर्तन गराइरहेको छ ।

प्रयोगशालामा गरिएको अध्ययनअनुसार सुरुमा चीनको बुहानमा देखिएको कोभिड–१९ भाइरस र युरोपमा फैलिएको बी११७ ले मुसामा सङ्क्रमण गर्न नसकेको वैज्ञानिकहरूको भनाइ छ ।

तर, पेरिसको पास्चर इन्स्टिच्युटका पशु चिकित्सक र मुसा आनुवंशिक विज्ञ डा. जेभियर मोन्ट्यागुटेलीका अनुसार पछिल्लो समय अफ्रिकामा देखिएको बी१.३५१ र ब्राजिलको पी१ भाइरसले मुसामा तीव्ररूपमा सङ्क्रमण फैलाउन सक्ने देखिएको हो ।

जङ्गलमा रहने मुसामा हालसम्म सङ्क्रमण देखिएकको छैन । भाइरसको नयाँ प्रकार मुसाबाट मानिसमा, मानिसबाट मुसामा वा मुसाबाट मुसामा सर्न सक्ने जोखिममाथि अध्ययन भइरहेको छ । कोरोना भाइरस चमेरोबाट कुनै एक जनावरमार्फत मानिसमा फैलिएको अनुमान गरिएको थियो । योसँगै अन्य जनावरमा पनि सोही सङ्क्रमण फैलिनु जोखिमयुक्त हुन सक्छ ।

विभिन्न प्रजातिमा जनावरमा भाइरसको सङ्क्रमण बढ्दै गएपछि सङ्क्रमित जनावरको प्रजाति नै विनाश हुने, सङ्क्रमण फैलिँदा हुने म्युटेसनले हानिकारक नयाँ भेरिएन्ट उत्पादन हुने जोखिमसमेत बढाउनेछ । जुन हाल विकास र वितरण गरिएका खोपले धान्न सक्दैन । छोटो समयमै भाइरस विभिन्न प्रजातिका जनावरमा तीव्ररूपमा फैलनु र नयाँ भाइरस पहिलेको तुलनामा थप सङ्क्रामक हुनाले महामारीको जोखिम लामो समयसम्म कायम रहने विज्ञहरूको भनाइ छ ।