सरकारले चैत २३ गते भित्र विश्वासको मत लिनुपर्छ : सांसद देव गुरुङ

नेकपा माओवादी केन्द्रका प्रमुख सचेतक तथा सांसद देव गुरुङले ओली सरकारले चैत २३ गते भित्र विश्वासको मत नलिए सरकारको हैसियतमा प्रश्न उठ्ने बताएका छन् ।

बुधबार प्रतिनिधिसभाको विशेष समयमा बोल्दै सांसद गुरुङले दल विभाजन भएको बताउदै चैत २३ सम्ममा सरकारले विश्वासको मत नलिए सरकारको हैसियतमा प्रश्न उठ्ने बताएका हुन् ।

उनले भने, ‘सरकारले दल विभाजन भएपछि विश्वासको मत लिनुपर्छ । २३ गते त्यसको ३० दिन पुग्छ । चैत २३ गते भित्र विश्वासको मत नलिए सरकारको हैसियत के हुन्छ भन्ने प्रश्न उठ्छ । संवैधानिक बेन्चले सरकारको अवस्थाबारे संविधानको धारा ७५ (१) को सरकार भएको भनेको थियो । पछिल्लो फैसलाले ७६ (२) आकर्षित गरेको छ । पछिल्लो फैसलाले दल विभाजन गरेको छ।’

साथै, सर्वाेच्च अदालतको फैसलाले दल विभाजन गराएको भन्दै सरकारले विश्वासको मत लिनुपर्ने समय चैत २३ सम्ममात्रै रहेको सांसद गुरुङले बताएका छन्। उनका अनुसार संसद विघटन गरेपछि सरकार स्वतः काम चलाउ हुने तर्क गर्दै अहिले पनि सरकार काम चलाउ नै रहेको छ ।

सांसद गुरुङले भने, ‘सर्वोच्चले संसदको पुनस्स्थापना गरेको हो, काम चलाउ सरकारको पुनस्स्थापना गरेको होइन । सरकार अहिले पनि काम चलाउ हो ।’