घरेलु टोली नेपालले त्रिदेशीय कप फुटबल प्रतियोगिताको उपाधि जितेको छ । सोमबार भएको फाइनल खेलमा बङ्गलादेशलाई २–१ गोलले हराउँदै नेपालले उपाधि चुमेको हो ।त्रिपुरेश्वरस्थित दशरथ रङ्गशालामा नेपाललाई जिताउन सञ्जोग राई र विशाल राईले समान एक–एक गोल गरे । बङ्गलादेशका लागि मेहबिबुर रहमानले एक गोल फर्काए ।
खेलको १८औँ मिनेटमा सञ्जोकले गोल गर्दै नेपाललाई अग्रता दिलाएका थिए । कर्नरमा बङ्गलादेशका डिफेन्डरले क्लियर गरेपछि आएको बलमा सञ्जोकले डिबक्सभित्रबाट उत्कृष्ट गोल गरे ।
मिडफिल्डर सञ्जोकको यो डेब्यु गोल हो । सञ्जोकले शनिबार बंगलादेशसँगको खेलमै राष्ट्रिय टिमका लागि डेब्यु गरेका थिए ।
यस्तै खेलको ४२औँ मिनेटमा विशालले गोल गर्दै नेपाललाई पहिलो हाफभरि २–० को अग्रता दिलाए ।
खेलको ८२औँ मिनेटमा रहमानले एक गोल फर्काए । र, बाँकी समय गोल हुन नसक्दा नेपालले २–१ गोलले हराउँदै उपाधि जितेको हो । यससँगै नेपालले ३७ वर्षपछि पहिलोपटक घरेलु मैदानमा ट्रफी उचालेकाे हो ।
आफ्नो दोस्रो खेलमा बङ्गलादेशलाई गोलरहित बराबरीमा रोक्दै नेपाल फाइनलमा पुगेको थियो । त्यसअघि बङ्गलादेश भने पहिलो खेलमै किर्गिस्तानमाथि १–० गोलको जित निकाल्दै फाइनलमा पुगेको थियो ।
नेपालविरुद्धको बराबरीसँगै किर्गिस्तान प्रतियोगिताबाट बाहिरिएको थियो ।
नेपालले प्रतियोगितामा गोल नगर्दै र जित हात नपार्दै फाइनलसम्मको यात्रा तय गरेको यो विरलै अवसर हो ।
फिफा विश्वकप छनोटका खेल स्थगित भएपछि एन्फाले बङ्गलादेश र कीर्गिस्तानलाई बोलाएर प्रतियोगिता गरेको हो ।
नेपाल, बङ्गलादेश र किर्गिस्तानबीचको उक्त प्रतियोगिताको विजेता टोली नेपालले पाँच हजार डलर पायो भने उपविजेता हुने टोली बङ्गलादेशले तीन हजार डलर पायो ।
विराज महर्जनको सन्यास
यसै खेलबाट पूर्वकप्तान विराज महर्जनले राष्ट्रिय टोलीबाट सन्यास लिएका छन् । खेलको ८८औँ मिनेटमा वैकल्पिक खेलाडीका रूपमा मैदान प्रवेश गर्दै विराजले राष्ट्रिय टोलीबाट बिदा लिएका हुन् । उनको यो ७३औँ राष्ट्रिय खेल थियो । विराजले ट्रफी उचाल्दै राष्ट्रिय टोलीबाट बिदा लिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |