महान्यायाधिवक्ताबाट राजीनामा दिएका अग्निप्रसाद खरेल सक्रिय राजनीतिमा फर्कने भएका छन् ।
उनले शुक्रबार राजीनामा दिँदै सक्रिय राजनीतिमा फर्किने घोषणा गरेका हुन् । २०७४ फागुन ८ गते उनी महान्यायाधीवक्त नियुक्त भएका थिए । सरकारको प्रमुख कानुनी सल्लाहकारका रूपमा रहेका खरेलले आफूले प्रधानमन्त्री केपी शर्मा ओलीसँग परामर्श गरेपछि राजीनामा दिएको बताएका छन् ।
उनको पुरानो पृष्ठभूमि राजनीति नै हो । खरेलले राजीनामा दिँदै म जहाँबाट आएको थिएँ, त्यतै फर्कन्छु भनेका छन् । फुटबल खेल्नका लागि बाहिरबाट नहुने भन्दै उनले आफू अब मैदानमै उत्रन लागेको बताए ।
प्रधानमन्त्रीले राजीनामा नदिँदासम्म नियुक्त गरेका सरकारका कानुनी सल्लाहकारले पद छोड्ने प्रचलन खासै छैन। यसअघि पूर्वमहान्यायाधिवक्ता बद्रीबहादुर कार्कीले पनि प्रधानमन्त्री शेरबहादुर देउवाको कार्यकाल छँदै राजीनामा दिएका थिए।
खरेल नेकपा एमालेका तर्फबाट यसअघि कानुनमन्त्रीसमेत भइसकेका छन्। उनले २०४७ सालको संविधान निर्माणका क्रममा एमाले नेता माधवकुमार नेपालको सहयोगीको रूपमा काम गरेका थिए।
पत्रकार सम्मेलनमा उनले पार्टीबाट जुनसुकै जिम्मेवारी पाए पनि निर्वाह गर्ने बताए। ‘राजनीतिक जीवनमा क्रियाशील हुन्छु। निष्ठापूर्वक काम गर्छु। शिर निहुर्याएर हिँड्ने काम गर्दिनँ’, उनले भने।
आफूले महान्यायाधिवक्ता कार्यालयमा आएपछि तीन वर्षमा गर्नसक्ने सबै काम गरेको र अब योभन्दा बढी काम गर्न नसक्ने भएकाले राजीनामा दिएको उनले बताए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |