आइसल्याण्डको राजधानी रिकिविकको दक्षिण–पश्चिमी क्षेत्रमा ज्वालामुखी बिस्फोट

आइसल्याण्डको राजधानी रिकिविकस्थित दक्षिण–पश्चिमी क्षेत्रमा ज्वालामुखी बिस्फोट भएको त्यहाँको मौसम विभागले जनाएको छ ।

रिकिन्स प्रायद्विपको फाग्राडाल्स्फलमा ज्वालामुखी बिस्फोट भएको हो । ठूला पत्थर तथा ढुंगाहरु आउन सक्ने तथा पहिरोसमेत जान सक्नेभन्दै स्थानीय बासिन्दालाई सचेत रहन आग्रह गरिएको छ ।

पछिल्लो तीन सातामा सो क्षेत्रमा ५० हजार भन्दा धेरै भूकम्प गएको बताइएको छ । भूकम्पपछि ज्वालामुखी बिस्फोट भएको हो । सन् २०१० मा आइसल्याण्डमै भएको ज्वालामुखी बिस्फोटका कारण युरोपको हवाई ट्राफिक प्रभावित भएको थियो ।

तर यसपटकको फाग्राडाल्स्फल ज्वालामुखीबाट ठूलो मात्रामा खरानी तथा धुवाँ ननिस्कने अनुमान छ । वेम्याम्स तथा स्याटेलाइट तस्बिरहरु मार्फत शुक्रबार बेलुकादेखि ज्वालामुखी बिस्फोट भएको पुष्टि भएको आइसल्याण्डको मौसम विभागले बताएको छ ।

ज्वालामुखी बिस्फोट भएको क्षेत्र राजधानीबाट ३० किलोमिटर पर पर्छ । सर्वेका लागि सो क्षेत्रमा कोस्टगार्ड हेलिकप्टर पठाइएको छ । सो टोलीले पठाएको पहिलो तस्बिरमा लाभा ओरालो झर्दै गरेको देख्न सकिने विभिन्न सञ्चार माध्यमले जनाएका छन् ।