प्रचण्ड–नेपाल नेतृत्वमा सरकार गठन हुनु भनेको गोरु व्याएर बिगौती खान खोजे जस्तै हो : सूर्य थापा

प्रधानमन्त्रीका प्रेस सल्लाहकार तथा नेकपा ओली समूहका केन्द्रीय सदस्य सूर्य थापाले प्रचण्ड–नेपालको नेतृत्वमा नयाँ सरकार बन्ने सम्भावना नरहेको बताएका छन् ।प्रतिनिधिसभा पुनःस्थापनापछि नेकपा प्रचण्ड–नेपाल समूहका अध्यक्षद्वय पुष्पकमल दाहाल प्रचण्ड र माधवकुमार नेपाल नयाँ सरकार गठनका विषयमा तीव्र भेटघाटमा छन् ।

त्यसतर्फ संकेत गर्दै नेता थापाले उनीहरुको नेतृत्वमा नयाँ सरकार गठन असम्भव भएको बताएका हुन् ।उनले सामाजिक सञ्जालमा लेख्दै भनेका छन्, पुष्पकमल दाहाल ‘प्रचण्ड’ र माधवकुमार नेपालको नेतृत्वमा प्रधानमन्त्रि नयाँ सरकार बन्ने संभावना त शून्य बराबर, अर्थात् असंभव नै छ ।’

प्रचण्ड–नेपाल नेतृत्वमा सरकार गठन हुनु भनेको गोरु व्याएर बिगौती खान खोजे जस्तै भएको उनको तर्क छ ।

उनले लेखेको स्टाटस यस्तो छ–

‘पुष्पकमल दाहाल ‘प्रचण्ड’ र माधवकुमार नेपालको नेतृत्व (प्रधानमन्त्रित्व) मा नयाँ सरकार बन्ने संभावना त शून्य बराबर, अर्थात् असंभव नै छ । यो गोरू ब्याएर बिगौती खान खोजेजस्तै मात्र हो । कान्तिपुरी नगरी परिक्रमाले देखाएको, अरू हेर्दै जाऔं ।’