सरकारले संसद् विघटन गरेर मुलुकलाई ठूलो राजनीतिक र संवैधानिक सङ्कटमा धकेल्ने काम गरेको छ ,मुलुकमा तेस्रो जनआन्दोलन हुनसक्छ

नेपाल कम्युनिष्ट पार्टी (नेकपा) प्रचण्ड माधव समूहका अध्यक्ष पुष्पकमल दाहालले कम्युनिष्ट आन्दोलनलाई विभाजित गर्ने काम प्रधानमन्त्री केपी ओलीले गरेको बताएका छन् ।

काठमाडौँमा शुक्रबार बिहान पत्रकासँगको छलफलमा अध्यक्ष दाहालले कम्युनिष्ट आन्दोलनलाई विभाजित गर्ने काम केपी ओलीमार्फत देशभित्र र बाहिरका दक्षिणपन्थी प्रतिक्रियावादीहरूले गरेको बताए ।

यद्यपि गल्ती कमजोरीलाई सच्याउँदै नेकपा पार्टीलाई बहुमतको दिशामा ल्याउन सकिन्छ भन्ने विश्वासका साथ अघि बढेको उनले स्पष्ट पारे । विस्तारै कार्यकर्ताहरूले सही–गलत छुट्याउन थालेकाले निराश हुने अवस्था नरहेको पनि उनले स्पष्ट पारे ।

उनले मुलुकमा ठूलो खतरा पैदा भएको बताउँदै लोकतन्त्रको रक्षा हुन्छ कि हुँदैन भन्ने प्रश्न नै मूल प्रश्न भएको बताए । संविधान कुल्चिएर असंवैधानिक बाटो हिँड्ने सरकारको कदम नसच्चिए तेस्रो जनआन्दोलन हुनसक्ने उनले सङ्केत गरे ।

उनले भने, ‘सरकारले संसद् विघटन गरेर मुलुकलाई ठूलो राजनीतिक र संवैधानिक सङ्कटमा धकेल्ने काम गरेको छ । प्रकारान्तले यो फेरि देशमा गृहयुद्ध होस् भन्ने चाहेको हो केपी ओलीजीले ? यो संविधानलाई कुल्चिने भनेको शान्तिलाई पनि कुल्चिने भन्या हो । शान्ति र आन्दोलनको पर्यायको रूपमा आएको संविधानलाई कुल्चिनु भनेको शान्ति भङ्ग गर्ने कुरा पनि हो । लोकतन्त्रको हत्या गर्ने भनेको अराजकताको सुरुआत गर्ने भनेको पनि हो ।’

‘यदि राज्य र नेतृत्वले दुर्घटनातिर देश लग्यो भने त फेरि कहीँ न कहीँबाट कोही न कोहीले अराजकताबाट फाइदा उठाउँछ । अतिवाद आउन सक्छ । विषय यसअर्थमा गम्भीर देख्छु । केपीले निर्णय गरे प्रचण्ड माधवले विरोध गरे । सामान्य छ भनेजस्तो होइन । शान्ति र संविधानसँग जोडिएको विषय भएकाले तेश्रो जनआन्दोलन हुन्छ हुँदैन भन्दा नि यो इसुलाई सच्याइन्छ कि सच्याइँदैन भन्ने हो,’ उनले थपे ।