फेसबुकले अस्थिरता ल्याएको भन्दै म्यानमारमा सेनाले लगायो फेसबुक प्रयोगमा प्रतिबन्ध

सैनिक शासनको विरोध भएपछि म्यानमारले अस्थायी रूपमा फेसबुक बन्द गरेको छ । म्यानमार टाइम्सका अनुसार यातायात तथा सञ्चार मन्त्रालयले मोबाइल अपरेटर तथा इन्टरनेट प्रदायकहरूलाई अस्थायी रूपमा फेसबुकलाई बन्द गर्न बुधबार निर्देशन दिएको थियो ।

सोही निर्देशन अनुसार बिहीबार फेसबुकलाई अस्थायी रूपमा बन्द गरेको मोबाइल अपरेटर टेलिनोर म्यानमारले बताएको छ । म्यानमारमा टेलिकम प्रदायकहरूलाई फेसबुक अस्थायी रूपमा बन्द गर्न निर्देशन दिइएको छ । त्यहाँका नागरिकले आफ्नो परिवार र साथीहरूसँग कुराकानी गर्न सकोस् र महत्वपूर्ण सूचनाहरूको पहुँचमा रहोस् भनेर कनेक्टिभिटीलाई पुनःस्थापना गर्न आफुहरुले अधिकारीहरूसँग आग्रह गर्न फेसबुकका प्रवक्ताले बताएका छन् ।

फेसबुकले आफ्नो राष्ट्रमा अस्थिरता ल्याएको भन्दै सरकारले बन्द गर्न लगाएको हो । एनग्याजेडका अनुसार फेसबुकलाई फेब्रुअरी ७ मध्यरातिसम्म बन्द गर्न निर्देशन दिएको छ । यसअघि फेसबुकले म्यानमार सैनिकद्वारा सञ्चालित म्यावाड्डी टिभी नेटवर्कको पेजलाई हटाएको थियो । यसले आफ्नो नीतिको उल्लंघन गरेको भन्दै हटाएको थियो ।