सडकबाट नेकपाको आधारिकता दाबी गरेको प्रचण्ड–नेपाल समूहले हालसम्म निर्वाचन आयोगमा निवेदन नदिएको रहस्य खुलेको छ । गत पुस ५ गते प्रतिनिधि सभा विघटनसँगै आउँदो वैशाख १७ र २७ गतेका लागि मध्यावधि निर्वाचनको मिति घोषणा गरेपछि सत्तारुढ नेकपा ओली र प्रचण्ड–नेपाल समूहमा विभाजित भएको हो ।
दुवै समूहका नेताहरु सडकबाट एकअर्काविरुद्ध अभिव्यक्ति दिइरहेका छन् । र प्रचण्ड–नेपाल समूहले आफूहरुसँग बहुमत रहेकाले नेकपाको आधारिकता पाउने सडकबाट ठूल्ठूलो स्वरमा भनिरहेको छ । तर, सडकमा भनिएजस्तै सो समूहले हालसम्म निर्वाचन आयोगमा नेकपाको आधिकारिताका लागि निवेदन नदिएको स्पष्ट भएको छ ।
प्रचण्ड–नेपाल समूहले आफूले गरेका निर्णयहरु अभिलेखिकरणका लागि मात्रै निवेदन दिएको निर्वाचन आयोगका आयुक्त ईश्वरीप्रसाद पौड्यालले जानकारी दिए ।
उनकाअनुसार हालसम्म आयोगको नजरमा नेकपा विभाजन नभएको र कुनै पनि समूहले आधिकारिकता मागेका छैनन् । प्रचण्ड–नेपाल समूहले जस्तै ओली समूहले पनि नेकपाको आधिकारिकता नमागी बैठकका निर्णयहरु अभिलेखिकरण गर्न आयोगलाई पत्र बुझाएका आयुक्त पौड्यालले जानकारी दिए ।
