राष्ट्रिय प्रजातन्त्र पार्टीका अध्यक्ष कमल थापाले संसद विघटनपछिको अवस्थाले संविधान र व्यवस्थामाथि नै गम्भीर प्रश्न चिन्ह खडा भएको बताएका छन्।
शुक्रबार जिल्ला अध्यक्षहरूसँगको भर्चुअल बैठकलाई सम्बोधन गर्दै थापाले संसद विघटनले मुलुकमा संकट गहिरिएर गएको र संवैधानिक जटिलता पैदा भएको बताए।
नयाँ नेपाल निर्माण, आमुल परिवर्तन र आर्थिक समृद्धिको लक्ष्य बोके पनि जनतामा सकारात्मक परिवर्तन दिन नसकेको थापाले बताए।
उनले जनता भ्रष्टाचार, कुशासन, धर्म परिवर्तन, बेरोजगारी र सर्वसत्तावादको जाँतोमा पिसिनु पर्ने बाध्यात्मक अवस्था आउनु दुर्भाग्यपूर्ण भएको बताए।
पार्टीको आगामी कार्यदिशा, संगठन, जनसंघर्ष र महाधिवेशन भएको भन्दै थापाले पार्टी विभाजनको पीडा अब कहिल्यै भोग्नु नपर्ने समेत थापाले बताए। पार्टीको भविष्यप्रति निश्चिन्त हुन आग्रह गर्दै थापाले आफूसहित पशुपतिशमशेर राणा र डा. प्रकाशचन्द्र लोहनीले पवित्र धार्मिक ग्रन्थ ‘गीता’ छोएर पार्टी एकताको निमित्त प्रतिवद्ध भएकोले देश, जनता, प्रजातन्त्र र कार्यकर्ताको निमित्त राप्रपालाई मुलुककै बलियो राष्ट्रबादी प्रजातान्त्रिक शक्ति बनाएर छाड्ने दृढता समेत व्यक्त गरे।
देशव्यापी संगठन सुदृढीकरण अभियानमा केन्द्रित हुन थापाले जोड दिए। बैठकमा सचिवालय प्रमुखद्वय ध्रुवबहादुर प्रधान र भाष्कर भद्राले राप्रपाको विचार र एजेन्डालाई स्थापित गर्ने विषय अहिलेको प्रमुख मुद्दा भएको भन्दै जनताको माझमा जान ढिला गर्न नहुने बताए।
बैठकमा ३१ जिल्लाका अध्यक्ष र प्रतिनिधिहरूको सहभागिता रहेको सचिवालय सदस्य राजाराम बर्तौलाले जानकारी दिए।
