किम जोंग उनको सनसनीपूर्ण बयान,जस्ले पूरै विश्वमा तरंग ल्यायो

अमेरिकामा सत्ता हस्तान्तरण हुँदै गरेका बेला उत्तर कोरियाली नेता किम जोंग उनले निकै सनसनीपूर्ण बयान दिएका छन् । किमको बयानले अहिले पूरै विश्वमा तरंग ल्याएको छ । किमले अमेरिका आफ्नो देशको सबैभन्दा ठूलो दुश्मन भएको बताएका छन् । उनले अमेरिकाको सत्तामा जोसुकै आए पनि वाशिङटनले प्योंगयांगप्रतिको सोच परिवर्तन गर्छ भन्ने आफूलाई नलागेको समेत बताएका छन् ।

बीबीसीका अनुसार देशको संसदलाई सम्बोधन गर्दै किमले यस्तो बताएका हुन् । सम्बोधनका क्रममा किमले उत्तर कोरियाको आणविक हतियारको भण्डार अझै बढाउने र सैन्य सम्भाव्यता समेत बढाउने प्रतिज्ञासमेत गरेका छन् । अमेरिकी राष्ट्रपति डोनाल्ड ट्रम्पले आफ्नो कार्यकालमा २ पटकसम्म किमसँग शिखर वार्ता गरेर उत्तर कोरियाको परमाणु कार्यक्रम रोक्ने प्रयास गरेका थिए । तर, ट्रम्प बाहिरिने बेलामा किमले परमाणु कार्यक्रम रोक्नुको सट्टा अझै विस्तार गर्ने बताएर अमेरिकालाई ठाडो चुनौती दिएका छन् ।

किमले उत्तर कोरियाले परमाणु हतियारको दुरुपयोग नगर्ने बताउँदै देशले आफ्नो परमाणु हतियार भण्डारलाई विस्तार गरिरहेको बताए । उत्तर कोरियाले विभिन्न नयाँ हतियारको परीक्षण र उत्पादनको तयारी गरिरहेको समेत उनले बताए । किमले फरक फरक आकारका वारहेड, हाइपरसोनिक हतियार, इन्टरकन्टिनेन्टर ब्यालेस्टिक मिसाइल, जासुसी उपकरण, ड्रोन लगायतका उपकरणको विकास गरिने बताए । एउटा परमाणु पनडुब्बीको शोध समेत लगभग पूरा भइसकेको उनले बताए ।