कोरोनाको कोभिशील्ड खोप नेपाल उच्च प्राथमिकतामा

भारतबाट आयात गर्ने तयारी भएको कोरोनाभाइरसविरुद्धको ‘कोभिशील्ड’ नामको खोप निर्यातका लागि प्रतिबन्धको समाचार सार्वजनिक भइरहँदा उत्पादक कम्पनीले भने कुनै प्रतिबन्ध नलगाइएको जनाएको छ ।

बीबीसीका अनुसार उत्पादक कम्पनी सीरम इन्स्टिच्यूट अफ इन्डियाले उक्त खोप निर्यातमा प्रतिबन्ध नलगाइएको जनाएको हो । बीबीसीको समाचारमा लेखिएको छ, भारत सरकारले त्यस्तो प्रतिबन्धबारे कुनै विज्ञप्ति वा सूचना जारी गरेको देखिएको छैन।

निर्यात प्रतिबन्धको खबरसँगै निराश बनेका सरोकारवाला पक्षहरु पछिल्लो जानकारीसँगै उत्साही बनेको बताइएको छ । भारतको पुणेस्थित सीरम इन्स्टिच्युट अफ इन्डियाले उत्पादन गरिरहेको कोभिशील्ड बेलायतको अक्सफोर्ड यूनिभर्सिटी र एस्ट्राजेनेकाले विकास गरेका हुन् ।

बीबीसी समाचारमा उल्लेख भए अनुसार सीरम इन्स्टिच्यूट अफ इन्डियाका अधिकारीले खोप निर्यातसम्बन्धी सार्वजनिक भएका खबर तथ्यगत नभएको पनि जनाएका छन् । तर उक्त खोप निर्यातका लागि केही महिना लाग्ने कम्पनीका अधिकारीहरुले जनाएका छन् ।

यसअघि भारतीय सहित अन्य केही मिडियामा उक्त खोप निर्यातमा प्रतिबन्ध लगाइएको समाचार सार्वजनिक भएका थिए । जसले गर्दा नेपाललाई समेत प्रत्यक्ष प्रभाव पर्ने देखिएको थियो ।

नेपाली अधिकारीहरुले भने जीटुजी प्रक्रियाबाट खोप ल्याउने तयारी गरेकाले नेपाललाई असर नपर्ने बताएका छन् । बीबीसमा प्रकाशित समाचारमा कोभिड-१९ खोप सल्लाहकार समितिका संयोजक डा. श्यामराज उप्रेतीले भनेका छन्, “हामीले जीटुजी प्रक्रियाबाट खोप ल्याउने भनेकोले खासै असर पर्दैन।”

उप्रेतीका अनुसार भारतसँग नेपालको उच्चस्तरमा हाम्रो वार्ता भइरहेको छ। र नेपालले अब नतिजा कुरिरहेको पनि उनले बताए । भारतका लागि नेपाली राजदूत निलाम्बर आचार्यले पनि खोप ल्याउने प्रक्रिया अघि बढिरहेको प्रतिक्रिया दिएका छन् । आचार्यले उत्पादक कम्पनीसँग सुरुदेखि नै नेपालको संवाद भइरहेको बीबीसीसँग बताए । समाचार अनुसार भारतले पनि नेपाल सहित छिमेकी देशहरुलाई उच्च प्रथमिकतामा राखेको छ ।