पार्टी विभाजनमा कुनै पक्षमा खुलेर नदेखिएका नेकपाका उपाध्यक्ष बामदेव गौतमले अध्यक्ष पुष्पकमल दाहाललाई आफू अझै पार्टी एकताकै पक्षमा रहेको र त्यसका लागि देशब्यापी रुपमा अभियान चलाउन लागेको भन्दै त्यसमा साथ दिन आग्रह गरेका छन्।
शुक्रबार बिहान झन्डै पौने एक घन्टा भएको छलफलमा नेता गौतमले पार्टी एकताको सम्भावना अझै रहेकाले आफूले बालुवाटारसँगै देशभरि रहेका पार्टीका नेतृत्वकर्ताहरुलाई समेटेर अभियान चलाउन लागेको जानकारी गराएका हुन्।
जवाफमा नेता दाहालले पार्टी एकताको पक्षमा आफू भए पनि प्रधानमन्त्री केपी शर्मा ओलीले पार्टी एक हुने गतिविधि नगरेकाले यो असम्भवजस्तै देखिएको र अब आफ्नो पक्षमा आउन ढिला नगर्न गौतमसँग आग्रह गरेका थिए।
स्रोतका अनुसार गौतमले नेता पार्टी एकताका लागि ओलीलाई आफूले चार सर्त राखेको खुलाएका थिए। उनका अनुसार पार्टी एकताका लागि प्रधानमन्त्री ओली र उपप्रधानमन्त्री ईश्वर पोखरेललाई पार्टीको संरक्षण रहन बस्न आग्रह गरिएको छ। दोस्रो सर्तका रुपमा दोस्रो तहका नेताहरुलाई पद हस्तान्तरणका लागि ओलीसँग आग्रह गरिएको छ। संसदको हैसियत जे भए पनि गठबन्धन जारी राख्ने प्रस्ताव पनि नेता गौतमले गरेका थिए।
त्यस्तै, नेता गौतमले विकास प्राधिकरण गठन गरी त्यसको नेतृत्व आफूलाई दिन पनि ओलीसँग आग्रह गरेका थिए। यी चार सर्त गौतमले ओलीसँग राखेको जानकारी दाहालसँग गराएका थिए। पार्टी विभाजनको अवस्थामा कसैसँग नदेखिएका गौतमलाई आफ्नो पक्षमा राख्न ओली र दाहाल दुवै पक्षले तानातान गरिरहेका छन्।
