अबको सम्पूर्ण ध्यान निर्वाचनमा हुनुपर्छ

नेपाल कम्युनिष्ट पार्टी (नेकपा) का अध्यक्ष केपी शर्मा ओलीले अबको सम्पूर्ण ध्यान निर्वाचनमा हुनुपर्ने बताएका छन्।

मंगलबार बालुवाटारमा आफूपक्षीय केन्द्रीय समिति सदस्यहरुको भेला गर्दै प्रधानमन्त्रीसमेत रहेका अध्यक्ष ओलीले १ हजार १ सय ९९ सय सदस्यीय महाधिवेशन आयोजक समिति पनि घोषणा गरेका छन्।

​नेकपाको हाल कायम रहेको ४ सय ४७ केन्द्रीय समिति सदस्यमा ५ सय ४७ सदस्य थप गर्नुभएको छ भने बाँकी १ सय ९६ सदस्य पछि थपिने व्यवस्थासमेत बैठकले गरेको छ । ओली पक्षले २०७८ मंसिर २ गते महाधिवेशन गर्ने निर्णय समेत गरेको छ।

अध्यक्ष ओलीले हाल कायम रहेको केन्द्रीय समितिले राष्ट्रिय राजनीतिमा प्रभावकारी भूमिका निर्वाह गर्न नसकेको बताएका छन्।

उनले भने, ‘पुरानो केन्द्रीय कमिटीले राष्ट्रिय राजनीति र पार्टीभित्र समेत बाह्य घुसपैठ र हस्तक्षेप रोक्नसमेत असफल भएँ। राष्ट्रियता, स्वतन्त्रता, स्वाधिनता, भौगोलिक अखण्डता, राष्ट्रिय हितको रक्षा गर्न सकेन। यसर्थ त्यो अभिभारा पूरा गर्न थप गर्नुपरेको हो।’

अध्यक्ष ओलीले प्रचण्ड–नेपाल समूहले सरकारलाई असफल बनाउन प्रयास गरिरहेको र महाभियोग लगाउने तथा अविश्वास प्रस्ताव राख्ने गतिविधि गरिरहेकोले पार्टीले गति लिन नसकेको बताए।

‘अब त उहाँहरु महाभियोग लगाउने, अविश्वास प्रस्ताव राख्ने, केन्द्रीय कमिटीबाट अध्यक्ष निकाल्ने, अरु नेताहरु निकाल्ने यो बाटोतिर पो खेती गरिराख्नुभएको छ। पार्टी एकीकरण टुङ्ग्याउने एकीकरणको बाटोबाट बढाउने होइन्। एकीकरणको बाटोबाट पार्टी अगाडि बढ्ने होइन्। बरु उहाँहरु भत्काउने कसैलाई निष्काशन गर्ने, कसैलाई कारबाही गर्ने, कुदेर राष्ट्रपतिकहाँ पुग्ने, कुदेर सभामुखकहाँ पुग्ने, कुदेर कहाँ पुग्ने यहि प्रकारको खेती गर्नुभएको छ। त्यसकारण हामीले निश्चित समयभित्र लगभग ११ महिनाभित्र महाधिवेशन गरिसक्ने छौं।

अब चुनावको तयारीमा जुट्ने र चुनावपछि अरु कामहरु बढी व्यवस्थित गर्ने, मातहतका कमिटीलाई पुनर्गठन गर्ने यावत कामहरु गर्नुपर्ने अवस्था आएको प्रधानमन्त्री ओलीले बताएका छन्। उनले थपे, ‘यी सबै कम गरेर हामी चुनावका लागि तयारी गर्छौं। चुनावमा हामीले कम्तीमा ५० लाख लोकप्रिय भोट ल्याउनु पर्नेछ।’