आन्तरिक विवाद चर्किरहेका बेला सत्तारुढ दल नेपाल कम्युनिस्ट पार्टी (नेकपा)का दुई अध्यक्षसहित शीर्ष नेताहरु छलफलमा जुटेका छन् ।
पार्टी अध्यक्ष एवम् प्रधानमन्त्री केपी शर्मा ओली, कार्यकारी अध्यक्ष पुष्पकमल दाहाल (प्रचण्ड), वरिष्ठ नेता माधव कुमार नेपाल र उपाध्यक्ष बामदेव गौतम छलफलमा जुटेका हुन् ।
चारै नेताको छलफल अध्यक्ष प्रचण्डको निजी निवास खुमलटारमा चलिरहेको जनाइएको छ । प्रचण्डलाई भेट्न शुरुमा करिब ११ बजेतिर प्रचण्डको निजी निवास खुमलटार पुगेका थिए ।
ओलीपछि उपाध्यक्ष गौतम र लगत्तै वरिष्ठ नेता नेपाल पनि खुमलटार पुगेका हुन् ।
यसअघि हिजो (शुक्रबार) ओली र प्रचण्डबीच प्रधानमन्त्रीको सरकारी निवास बालुवाटारमा भेटवार्ता भएको थियो ।
शुक्रबारको भेटवार्ताका क्रममा प्रचण्डले ‘म मात्रै तपाईंलाई भेट्न आइरहनु पर्छ । तपाईं पनि आउनु न कहिलेकाँहि मेरोमा,’ भने पनि प्रधानमन्त्री ओली शनिबार प्रचण्डको निजी निवास पुगेका हुन् ।
सरकार (मन्त्रिपरिषद)को सिफारिसमा गत मंगलबार राष्ट्रपति विद्यादेवी भण्डारीले संवैधानिक परिषद ऐन संशोधन गर्न अध्यादेश जारी गरेपछि नेकपा विवाद थप चर्किएको छ । बुधबार बसेको स्थायी कमिटी बैठकमा प्रधानमन्त्री ओलीले अध्यादेश फिर्ता लिने ‘बाचा’ गरेपछि फिर्ता भने गरेका छैनन् ।
अध्यक्ष प्रचण्डसहित वरिष्ठ नेता माधव नेपालले तत्काल अध्यादेश फिर्ता लिनुपर्ने अडान राखेका छन् भने ओली अझै केही दिन ‘पर्खिने’ मनस्थितिमा छन् ।
कोरोना भाइरसको महामारी शुरु भएदेखि प्रधानमन्त्री ओली सरकारी निवास बालुवाटारबाट बिरलै मात्र बाहिर निस्किएका छन् ।
पछिल्लो समय पार्टीको सचिवालय बैठक पार्टी मुख्यालय धुम्बाराहीमा राख्न खोज्दा ओलीले सुरक्षा चुनौती रहेको भन्दै त्यहाँ जान मानेका थिएनन् । धुम्बाराहीमै बसेको स्थायी कमिटी बैठकमा ओली सहभागी भएनन् ।
