एकै वर्षमा आफ्नो तीन अभिभावक गुमाएर साहाराविहीन बनेका मुगुको छायाँनाथ रारा नगरपालिका–११ ¥याङ्गचेकाटीका चार बालबालिकाको लागि सहयोग जुटेको छ ।
एकै वर्षभित्र बुबा, हजुरबुबा र हजुरआमाको मृत्यु भएपछि ¥याङ्गचेकाटी गाँउका १२ वर्षीय युवराज कुमाल र उनका तीन भाईबहिनीहरु साहाराविहीन बनेका थिए ।
अभिभावक विहीन हुँदा ती बालबालिकाहरुकोे पालनपोषण, शिक्षा र आवासमा समस्या भएको थियो । सोही समस्या न्यूज २४ नेपाल डट टीभी, हाम्रा कुरा डट कम, संसार न्यूज डट कमलगायतमा सम्प्रेशन गरिएको थियो ।
उक्त समाचार सम्पेशन भएपछि हाम्रा कुरा डट कमका संस्थापक अजयबावु सिवाकोटी र संसार न्यूज डट कमकी प्रबन्ध सम्पादक चन्द्रिका राना थापा(चन्दा)को पहलमा देश तथा विदेशमा रहेका मनकारी व्यक्तित्वबाट २ लाख २१ हजार ५ सय रुपैयाँ सहयोग जुटेको छ ।
क्त संकलित रकम (सहयोग) बुधबार नेपाल पत्रकार महासंघ मुगु शाखाका अध्यक्ष नृपेन्द्र बहादुर मल्ललगायतले साहाराविहीन बालबालिकाको घरमै पुगेर हस्तान्तरण गरेका छन् ।
बेसाहारा बालबालिकाकी आमा सौमती कुमालले उक्त सहयोग रकम बुझ्दै सहयोग गर्नेहरु आफ्नो लागि भगवान भएर धर्तीमा आएको बताइन् । आफ्नो बालबालिकाको शिक्षा र लालन पालनमा उक्त रकम खर्च गर्ने उनले बताइन् ।
उनले दाताहरुको सहयोग खेर जान दिन्नौं भन्दै सहयोगी र मुगुका सन्चारकर्मीहरुलाई भगवान सम्झेकी छन् । एकै वर्षभित्र बाजे, बाबु र बजैको किरिया बसेका १२ वर्षीय युवराजले भने, ‘आफ्ना स–साना भाई बहिनीको अभिभावक भनेको म नै भएको छु । घरमा कमाउने कोही छैन । आमाको कमाईले घर चलाउने कि हामी पढ्ने ?’
उनले थप भने, ‘हाम्रो दयनीय अवस्था देखेर समाचार लेख्नुभएछ । हामीले कहिल्यै नदेखेको रकम सहयोग पाएका छौं ।’ भविष्यमा हामीले सही ठाँउमा सहयोग गरेका रहेछौं भन्ने देखाउने गरी आफु पढ्ने र भाई बहिनीलाई पढाउने उनले बताए ।
समाचारकै प्रभावका कारण छायाँनाथ रारा नगरपालिकाले पनि यस परिवारलाई ओड्ने ओछ्याउने कपडा र खाद्यन्न सहयोग गरेको छ ।
त्यस्तै, हिमाली ग्रामिण युवा तथा समाजविकास केन्द्र (हिरिसडेक) मुगुका अध्यक्ष मुकुन्द रावलले पनि उनीहरुलाई स्कुल झोला, न्यानो कपडा सहयोग गरेका छन् ।
