प्रमुख प्रतिपक्षी नेपाली कांग्रेसका सभापति शेरबहादुर देउवाले चुनाव अघि आफूले भनेका कुरा मिल्दै गएको बताएका छन्।
कम्युनिष्टहरू जिते भने हाँस्न त के रून पनि पाइँदैन भनेको स्मरण गर्दै देउवाले हिजोआज कोही रोयो भने प्रधानमन्त्री केपी शर्मा ओलीको खिलापमा रोएको भनेर पक्रेर लैजाने अवस्था रहेको बताए।
‘मैले भनेको थिएँ, कम्युनिष्टहरू जितेछि हाँस्न त के रूँन पाइने छैन भनेर। आज कोही रोयो भने किन रोयो भनेर जेल हाल्न बेर छैन,’ मकवानपुरमा आज भएको प्रदर्शनपछि कोणसभामा देउवाले भने।
मानिसहरू कोरोना वा औषधि नपाएर रोए पनि ओलीको खिलापमा रोएको भनेर पक्रने स्थिति रहेको देउवाको भनाइ छ।
‘कोरोना। वा औषधि नपाएर रोए पनि ओलीको खिलापमा जस्तो लाग्छ। पक्रेर लैजाने अवस्था छ,’ उनले भने, ‘यो सरकारले एकदलीय सर्वसत्तावादी शासन लागू गर्न खोजेको छ।’
