नेकपाको स्थायी कमिटी बैठक भोली आइतबार , एक साता पुग्दा पनि कुनै सहमति जुटेन

सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक भोली आइतबार बस्दैछ । गत २१ गतेको स्थायी कमिटी बैठक स्थगन भएको एक साता पुग्दा पनि कुनै सहमति भने हुन सकेको छैन ।

नेताहरुबीच छलफल जारी रहे छ । तर, सहमतीको ‘बिन्दू’ भेटिएको छैन । पहिलो तहका नेताहरु एकअर्कासंग संवाद नगर्ने अवस्थामा आइपुगेका छन् । दोस्रो तहका नेताहरु मध्यस्तकर्ताको भूमिका निभाउने प्रयास गरिरहेका छन् । त्यसैको परिणाम गत बुधबार अध्यक्षद्वयबीच लामो समयपछि संवाद भएको थियो । त्यो दिन संवादहीनता त तोडियो त कुनै सहमति भएन । त्यसयता शनिबार बिहानसम्म दुई अध्यक्षबीच फेरि भेट हुन सकिरहेको छैन । दुबैजना आफ्नो अडानमा कायमै रहेकाले अहिलेसम्म विवादको गाँठो झनै कसिलो बन्दै गएको चर्चा हुन थालेको छ ।

यसको छनक बिहीबार आफू निकटका वाग्मती प्रदेशस्तरीय नेता कार्यकर्ता भेलामा अध्यक्ष प्रचण्डको अभिव्यक्तिबाट पनि प्रस्ट हुन्छ । प्रचण्डले आफूले ओलीबाट धेरै अपमान सहेकोले अब थप सहन नसक्ने बताएका थिए । ‘ओलीको कडा खालको बुहार्तन सहेँ, साह्रै अपमानित भए । पार्टी एकताका लागि सहेकै थिए । अब सहन सक्दिन’ प्रचण्डले भेलामा भने ‘एकताकै लागि सम्झौता पनि गरियो तर अब दुई जनाबीच सहमति मात्रै होइन संवाद नै नहुँने अवस्थामा पुगियो, अब हाम्रो भेट कमिटीका बैठकमा मात्रै हुनेछ ।’

एकातिर अध्यक्षद्वयबीच संवादहीनता थप गहिरिदै गएको छ भने अर्कोतिर दुबै पक्षले आफ्ना गुटहरुमा समूहगत छलफल सुरु गरिसकेका छन् ।

प्रधानमन्त्री एवं अध्यक्ष ओलीले बालुवाटार मै आगामी रणनीति तय गर्नका लागि दिनहुँ संवाद गरिरहेका छन् । अध्यक्ष प्रचण्ड—माधव नेपाल समूहले खुमलटार र नेताहरुको निवासमा हुने शीर्ष नेतृत्वबीचको छलफललाई विभिन्न सभाहल एवं विभिन्न तहका नेताहरुसम्म लिएर बहसमा उत्रिसेको छ । यो समूहले आफू निकट स्थायी कमिटी, केन्द्रीय समिति र प्रदेश नेतृत्वसंग पनि संवाद तथा भेला सुरु गरेको छ । बिहीबारको भेला पनि त्यहीं संवादको निरन्तरता थियो ।

दुवै पक्षले तल्ला कमिटीसम्म आफ्नो कुरा राख्ने र गोप्य एवं खुला भेला सुरु गरिसकेका छन् । यस्ता छलफलले विवाद समाधानको सट्टा पार्टी जस्तो सुकै संकटबाट गुज्रिनसक्ने अवस्था आउन लागेकोले गुटका नेता तथा कार्यकर्तालाई मानसिक रूपमा तयार रहन सन्देश दिन खोजेको देखिन्छ ।

नेकपा संसदीय दलका उपनेता सुवास नेम्वाङ भने छलफलमार्फत निकास निस्किनेमा विश्वस्त छन् । उनले विवाद समाधानको एउटै उपाय संवाद र छलफल नै भएकोले विभिन्न समूहमा हुने संवादले एकताको वातावरण बनाउन सघाउनुपर्ने बताए ।

अहिले दुबै पक्ष एकअर्काप्रति आक्रोसित छ । ओलीले सकेसम्म थकाउने र गलाउने रणनीति अपनाइरहेका छन् । उनले आफू नभएको बैठकबाट कुनै निर्णय हुन नसक्ने आँकलन गरी बैठकमै उपस्थित नहुने रणनीति अपनाइरहेका छन् ।

तर, नेतृ अष्टलक्ष्मी शाक्य भने अब पार्टी गतिविधि कुनै एक व्यक्तिका कारण ठप्प नहुने बताउँछिन् । ‘बैठक र छलफलको विकल्प छैन । अहिलेसम्म ओलीलाई २८ गतेको बैठकमा ल्याउने गरी संवाद भइरहेको छ । फेरि पनि बैठक छल्ने प्रयास भएमा स्थायी कमिटीले परिणाम दिनै पर्छ’ शाक्यले भनिन्, ‘अब कसैका लागि कुर्ने अवस्था आउनुहुन्न । ओली बैठकमा नआए उहाँको प्रस्तावमा छलफल नै हुन्न, त्यसपछि आउने परिणामको सम्पूर्ण दोष उहाँलाई नै जान्छ ।’

नेकपामा लामो समयदेखि उत्पन्न विवाद कार्तिक २८ गते सचिवालय बैठकबाट औपचारिक रुपमा सतहमा आएको थियो । त्यसपछि एकपछि अर्को गरी दुई अध्यक्षका जवाफी प्रतिवेदनले माहोल थप प्रतिकूल बन्दै गएको छ । मंसिर १३ गतेपछिका केही बैठकमा उपस्थित नभएका ओली २० गतेको सचिवालय बैठकमा उपस्थित भए पनि विवाद समाधान नभएपछि २१ गतेको स्थायी कमिटी बैठकमा उपस्थित भएनन् । त्यहीं कारण त्यस दिन अध्यक्षद्वयका प्रतिवेदनमाथि छलफल नै नभएर बैठक २८ गतेका लागि स्थगित भएको थियो ।

तर, आइतबार बस्ने बैठक कसरी अगाडि बढ्छ, केपी शर्मा ओली बैठकमा उपस्थित हुन्छन् कि हुँदैनन् ? यस विषयमा अहिल्यै केही भन्ने अवस्था छैन् । ‘रात रहे अग्राख पलाउँछ’ भनेझैं बैठक बस्नुअघि कुनै समझदारी नभएमा नेकपाको विवाद नयाँ चरणमा प्रवेश गर्ने विश्लेषण हुन थालेको छ ।