नेपाल कम्युनिष्ट पार्टी (नेकपा) का केन्द्रीय सदस्य तथा पूर्व सांसद कमान सिंह लामाको कोरोना सङ्क्रमणका कारण निधन भएको छ । लामाको बुधबार राती करिब १० बजे काठमाडौको शिक्षण अस्पतालमा उपचारका क्रममा निधन भएको उहाँको परिवारले जनाएको छ ।
दक्षिण कोरोरियाका लागि नेपाली पूर्व राजदुत तथा पूर्व सांसद लामालाई करिब १६ दिन अघि कोरोना सङ्क्रमण पुष्टि भएको उहाँका भाइ इमान सिंह लामाले जानकारी दिनुभयो । लामा चिनीरोग, मुटुको समस्याबाट समेत पीडित हुनुहुन्थ्यो ।
लामाको जन्म वि.सं. २००८ साल फागुन ९ गते काभ्रेपलाञ्चोक जिल्ला हालको चौरीदेउराली गाउँपालिका–७ मादनकुँडारीको कुँडारीमा भएको थियो । उहाँ सन् २०१२ मे महिनादेखि २०१६ मे महिनासम्म दक्षिण कोरियाका लागि नेपाली राजदूत हुनुभएको उहाँको परिवारले जनाएको छ ।
वि.सं. २०२६ सालदेखि नै आफ्ना दाजु कमान सिंह नेपाली राजनीतिमा लाग्नु भएको भाइ इमानले बताउनुभयो । सुरुमा पञ्चायत व्यवस्थाबाट राजनीतिक यात्रा प्रारम्भ गर्नुभएका कमान सिंह राजनीतिक परिवर्तनका लागि होमिँदा विभिन्न समयमा जेल जीवन समेत बिताउनुभएको थियो । लामाले वि.सं. २०४८ सालको आम चुनावमा काभ्रे क्षेत्र नम्बर १ को जनमोर्चा पार्टीको तर्फबाट उम्मेदवार बनी निर्वाचन जित्नुभएको थियो ।
कोरोनाबाट मृत्यु हुनुभएका लामाप्रति नेपाल कम्यूनिष्ट पार्टी (नेकपा) बरिष्ठ नेता एवं पूर्व प्रधानमन्त्री माधबकुमार नेपाल, केन्द्रीय सदस्य एवम् पूर्व सञ्चार तथा सूचना प्रविधि मन्त्री गोकुलप्रसाद बाँस्कोटा, बागमती प्रदेश सभाका सांसद लक्ष्मण लम्साल, नेकपाका जिल्ला नेताहरुले लामाले वामपन्थी तथा लोकतान्त्रिक आन्दोलनमा महत्वपूर्ण योगदान पु¥याएको भन्दै सामाजिक सञ्जालमार्फ शोक व्यक्त गनुभएको छ ।
