महोत्तरीको बर्दिबासमा पान पसल सञ्चालन गर्दै आएका बेचन महतोको शव एक शौचालयमा भेटिएको छ । पान पसले महतोको लास विहीबार बिहान ६ बजेतिर बर्दिबास नगरपालिका–१४ स्थित निकेश श्रेष्ठको घरको शौचालयमा भेटिएको हो ।
ईलाका प्रहरी कार्यालय बर्दिबासका प्रहरी निरीक्षक बालिष्टर सिंहले शवको प्रकृति हेर्दा अत्याधिक मदिरा सेवनबाट महतोको मृत्यु भएको हुनसक्ने प्रारम्भिक अनुमान गरिएको बताए ।
मृतक बेचन, निकेश र सोही ठाउँ बस्ने रोहित महतो घनिष्ट साथी थिए । उनीहरुलाई भेट्न बुधबार साँझ बेचन उनको घर गएका थिए । धनुषाको मुखियापट्टी मुसहनिया घर भएका महतो बिगत ४ बर्षदेखि बर्दिबासमा पान पसल सञ्चालन गर्दै आएका थिए ।
उनको बर्दिबास वडा नं. १४ मै ससुराली भएपनि श्रीमतिसँग सम्बन्ध विच्छेद भइसकेको थियो । मृतक महतोको शवलाई पोष्टमार्टमका लागि प्रादेशिक अस्पताल जनकपुर पठाइएको ईप्रका बर्दिबासले जनाएको छ ।
