रोनाल्डो भन्छन उमेरले फरक पर्दैन अझै धेरै वर्ष खेल्नेछु

पोर्चुगिज खेलाडी क्रिस्टियानो रोनाल्डोले अझ धेरै वर्ष फुटबल खेल्ने आशा व्यक्त गरेका छन् । ‘बिबिसी स्पोर्ट्स’सँगको कुराकानीमा इटालियन क्लब युभेन्टसका स्ट्राइकर रोनाल्डोले फुटबलमा उमेरले फरक नपार्ने उल्लेख गर्दै धेरै वर्ष खेल्नेमा आफू आशावादी भएको बताए ।

रोनाल्डो आगामी फेब्रुअरीबाट ३६ वर्ष पुग्नेछन् । पाँच पटकका बालोन डी‘ओर विजेता रोनाल्डो सर्वाधिक सफल फुटबल खेलाडी हुन् । तीन फरक राष्ट्रबाट व्यवसायिक फुटबलको अनुभव बनाएका रोनाल्डोले हाल सिरी ‘ए’मा उत्कृष्ट प्रदर्शन गरिरहेका छन् ।

अङ्कतालिकामा युभेन्टस दोस्रो स्थानमा रहँदा रोनाल्डो सर्वाधिक गोलकर्ताको सूचीमा शीर्ष स्थानमा छन् । यस सिजनको सिरी ‘ए’मा उनले १० खेल खेल्दा १२ गोल गरेका छन् । रोनाल्डो अन्तर्राष्ट्रिय फुटबलमा इरानका अली डेइको एक सय ९ गोलको विश्व कीर्तिमानबाट मात्र ७ गोलले पछि छन् ।

सन् २०२२ मा हुने कतार विश्वकपमा उनी ३७ वर्षका हुनेछन् । तर, उनले सो विश्वकपमा सहभागी हुने र जित्ने चाहना व्यक्त गरेका छन् । ‘उमेरले केही फरक पार्दैन । दिमागमा के हुन्छ, त्यो महत्त्वपूर्ण हो । रोनाल्डो ठीक छन् भन्न कुराले केही फरक पार्दैन । भोलि के हुन गइरहेको भन्ने कुरा तपाईंलाई थाहा हुँदैन । म वर्तमानमा बाँच्छु,’ उनले भने ।

‘अहिलेको पल राम्रो छ, मैले खुसी अनुभव गरिरहेको छु । मैले तीखो महशुस गरेको छु र यो नै मेरो जीवनको सुखद पल हो । अझ धेरै–धेरै वर्ष खेल्नेमा आशावादी छु तर तपाईंलाई कहिल्यै थाहा नहोला’, उनले थपे ।

यस्तै रोनाल्डो कोरोना भाइरस महामारीका कारण दर्शकविनाको रित्तो स्टेडियममा खेल्न बाध्य हुनु परेका कारण असन्तुष्ट बनेका छन् ।

गत आइतबार दुवईमा आयोजित ग्लोब सकर अवार्ड समारोहमा ‘प्लेयर अफ दि सेन्चुरी’ अवार्ड जितेपछि बोल्दै रोनाल्डोले रित्तो स्टेडियममा बाध्यात्मक तरिकाले फुटबल खेल्नुपरेको अवस्था उल्लेख गर्दै असन्तुष्टि पोखे ।

दुवई अन्तर्राष्ट्रिय खेलकुद परिषद्ले युभेन्टसका फरवार्ड क्रिस्टियानो रोनाल्डोलाई सो अवार्ड प्रदान गरेको थियो ।

अवार्ड समारोहमा बोल्दै रोनाल्डोले भने, ‘इमान्दारिताका साथ भन्नुपर्दा मेरा लागि खाली स्टेडियम बिल्कुलै पट्टाइ लाग्दो हो । पक्कै पनि स्वास्थ्यका मापदण्ड पूरा गर्नुपर्छ, स्वास्थ्य नै सबैभन्दा महत्त्वपूर्ण कुरा हो । तर, इमान्दारिताका साथ भन्दा मलाई रित्तो स्टेडियम मन पर्दैन । मलाई मात्र होइन, हामी सबै खेलाडीलाई यस्तै हुनुपर्छ ।’

‘मैले यो भन्नैपर्छ किनकि मलाई फुटबल खेल्न मन पर्छ । मेरो जिन्दगी नै फुटबल हो । म मेरा परिवार, बच्चा, साथी र समथर्कका लागि खेल्छु । तर, रित्तो मैदानमा खेल्दा अनौंठो लाग्छ । जब दर्शकले क्रिस्टियानो भन्दै समर्थनको नारा लगाउँछन् । जब मैले बल छुँदा दर्शक उत्साहित हुन्छ । त्यो मलाई मन पर्छ’, उनले थपे ।

यस्तै रोनाल्डोले २०२१ मा चाहिँ रङ्गशाला दर्शकले भरियोस् र नियम परिवर्तन हुन सकोस् भनी कामनासमेत गरेका छन् ।