कञ्चनपुरको भीमदत्त नगरपालिकाकाकी १३ वर्षीया बालिका निर्मला पन्तको बलात्कार पछि हत्या प्रकरणमा बर्खास्तीमा परेका नेपाल प्रहरीका उपरीक्षक (एसपी) डिल्लीराज विष्टलाई सरकारले पुनर्वहाली गरेको छ ।
बुधबार बसेको मन्त्रिपरिषदको बैठकले विष्टलाई पुनर्वहाली गर्ने निर्णय गरेको हो ।
१० साउन २०७५ मा घरबाटै साथीको घर हिँडेकी कञ्चनपुरको भीमदत्त नगरपालिकाकी १३ वर्षीया बालिका पन्तको दोस्रो दिन (११ साउन २०७५)मा स्थानीय उखु बारीमा शव फेला परेको थियो ।
१३ वर्षीया बालिका पन्तको बलात्कार पछि हत्याको घटना हुँदा विष्ट कञ्चनपुर प्रहरी प्रमुख थिए । पन्तको बलात्कार पछि हत्या घटनाको अनुसन्धानमा लापरवाही गरेको भन्दै उनलाई कारबाही गर्न सरकारी अनुसन्धान टोलीले नै सिफारिस गरेको थियो ।
घटनामा भएको भनिएको लापरबाहीबारे अनुसन्धान गर्दा निलम्बनमा परेका विष्टलाई पछि प्रहरी प्रधान कार्यालयको पत्रअनुसार ‘भविष्यमा सरकारी सेवाका लागि अयोग्य नहुने’ गरी सेवाबाट बर्र्खास्त गरिएको थियो ।
सरकारले तत्कालीन कञ्चनपुर प्रहरी प्रमुख विष्टसहित वडा प्रहरी कार्यालय महेन्द्रनगरका तत्कालीन प्रमुख इन्सपेक्टर जगदीश भट्टलाई पनि बर्खास्त गरेको थियो ।
विष्ट र भट्ट दुवैले पुनर्वहालीको माग गर्दै मन्त्रिपरिषदमा निवेदन दिएका थिए ।
सरकारी अनुसन्धान समितिले नै कारबाही सिफारिस गरेका विष्टलाई अदालतले भने पछि सफाइ दिएको थियो ।
