कोरोनाविरुद्धको अक्सफोर्ड खोपलाई बेलायतमा अनुमति

अक्सफोर्ड विश्वविद्यालयका वैज्ञानिकहरूले विकास गरेको कोरोना भाइरसविरुद्धको खोपले बेलायतमा प्रयोग गर्न अनुमति पाएको छ ।

नियामक निकाय मेडिसिन एन्ड हेल्थकेयर प्रोडक्ट्स रेगुलेटरी एजेन्सी (एमएचआरए) ले खोपको दुवै डोजलाई प्रयोगका लागि अनुमति दिएको हो । फाइजर–बायोएनटेकको खोप डिसेम्बरमा वितरणपछि अक्सफोर्डको खोप बेलायतमा स्वीकृत हुने दोस्रो खोप हो । स्वास्थ्य सचिव म्याट ह्यान्ककले खोप वितरण ४ जनवरीदेखि सुरु हुने जानकारी दिँदै अर्को वर्षको पहिलो केही हप्ताहरूमा निरन्तर खोप वितरण हुने बताएका छन् ।

उक्त खोप पनि प्रतिव्यक्ति दुई डोज आवश्यक पर्ने बताइएको छ । बेलायतले एस्ट्राजेनेकाको सहकार्यमा बनाएको १० करोड अक्सफोर्ड खोपको डोज अर्डर गरेको छ, जसको मतलब पाँच करोड मानिसलाई खोप दिन पर्याप्त हुन्छ । बेलाययतमा प्रयोग अनुमति दिनुको अर्थ खोप प्रभावकारी र सुरक्षित छ भन्ने पुष्टि भएको छ ।

बुढापाका, केयर होममा बसेका, स्वास्थ्यकर्मीहरूलगायत खोपका लागि प्राथमिकता समूह पहिल्यै पहिचान भइसकेको छ । अक्सफोर्ड–एस्ट्राजेनेकाको खोप ६२, ७० र ९० प्रतिशत प्रभावकारी रहेको पाइएको छ । अक्सफोर्ड–एस्ट्राजेनेकाको खोप फाइजरको खोपको तुलनामा व्यवस्थापन र भण्डारण गर्न निकै सहज हुनुका साथै कम खर्चिलो पनि रहेको छ ।

पहिलो डोज लिएको १२ हप्ताभित्र दोस्रो डोज दिइने बताइएको छ । दोस्रो डोजले कोर्स पूरा गरी दीर्घकालीन सुरक्षाको प्रदान गर्न महत्त्वपूर्ण हुन्छ । बेलायतमा नयाँ प्रकारको कोरोना सङ्क्रमण देखिएको र सङ्क्रमितको सङ्ख्याले दिनहुँ बढ्दो क्रममा रहेको बेला खोपले अनुमति पाउनुले ठूलो राहत मिल्ने आशा गरिएको छ । कोरोनाको नयाँ स्वरूपविरुद्ध पनि यो खोप प्रभावकारी हुने बताइएको छ ।