राष्ट्रिय सभा अध्यक्ष गणेशप्रसाद तिमिल्सिनाले राष्ट्रिय सभाको अधिवेशनमा उपस्थित हुने राष्ट्रिय सभा सदस्यहरुलाई स्वास्थ्य सुरक्षा तथा सतर्कता अपनाउन अपिल गरेका छन् ।
अध्यक्ष तिमिल्सिनाले पुस १७ गते राष्ट्रिय सभाको अधिवेशनको पहिलो बैठक बस्ने र त्यसको निम्ति बिहीबार राष्ट्रिय सभा सदस्यको कोभिड १९ परीक्षणको व्यवस्था गरिएको जानकारी दिए । तर यो अवधिभर राष्ट्रिय सभा सदस्यहरुलाई स्वास्थ्य सर्तकता अपनाउन आग्रह गरेका छन् ।
१७ गतेको बैठकको निम्ति सङ्घीय संसद् सचिवालयले स्वास्थ्य मापदण्ड पूरा गरी आवश्यक तयारी गरेको पनि अध्यक्ष तिमिल्सिनाले बताए । संसदभित्रको तयारीले मात्रै कोभिड सङ्क्रमण रोक्न पर्याप्त नहुने भन्दै उनले सम्पूर्ण राष्ट्रिय सभा सदस्यहरुलाई बैठक अवधिभर बाहिरी गतिविधिमा जाँदा सावधानी अपनाउन आग्रह गरे ।
उनले भने, ‘अहिले हामी कोभिड–१९ कै महामारीकै बीचमा छौँ । तसर्थ स्वास्थ्य सावधानी अपनाउने कुरामा माननीयज्यूहरुले अलिक सर्तकता, क्वारेन्टाइनमा बस्ने पनि विचार गरेर आइदिनुपर्यो ।’
अध्यक्ष तिमिल्सिनाले राष्ट्रिय सभा सदस्यबाहेक बैठकस्थलमा प्रवेश गर्ने सुरक्षाकर्मी, पत्रकार, कर्मचारी लगायत सबैलाई पनि सर्तकता अपनाउन अनुरोध गरेका छन् । उनले भने, ‘जो त्यहाँ जान्छौँ, उहाँहरु उच्च सर्तकताका साथ जानुपर्यो । दुरी कायम राखिदिने, मास्कको अनिवार्य प्रयोग गरिदिने, सेनिटाइजरको प्रयोग गरी स्वास्थ्य मापदण्डका प्रक्रियाहरु पूरा गरिदिनु पर्यो ।
अध्यक्ष तिमिल्सिनाले स्वास्थ्य सावधानी अपनाउन सकेको खण्डमा राष्ट्रिय सभाको यस अधिवेशनलाई स्वास्थ्यको कारण आउने बाधाविना नै अगाडि बढाउन सकिने विश्वास व्यक्त गरे । साथै उनले प्रतिनिधि सभा नभएको अवस्थामा बिलहरु दुवै सदनबाट पास गरेर ऐन बनिहाल्ने अवस्था नभएको उल्लेख गर्दै सरकारी बिजनेस भएन भने सदन लामो समय लैजान नसकिने बताए ।
