केपी ओली नेतृत्वको सरकारमा ऊर्जामन्त्री फेरिएसँगै काठमाडौं उपत्यकामा लोडसेडिङ बढ्न थालेको छ।
मानिसहरूले बत्ती जाने समस्या बढेको गुनासो गर्न थालेका छन्।
मंगलबार पनि बानेश्वर,कोटेश्वर लगायत उपत्यकाका विभिन्न क्षेत्रमा धेरै बेर बत्ती आएन। यस्तो समस्या केही दिन यता निरन्तर देखिरहेको छ।
बत्ती आएपनि छिनमै जाने-आउने देखिने गरेको छ। यसका कारण बल्ब फ्युज हुने लगायतका समस्या धेरै ठाँउमा देखिएको छ।
बत्ती धेरै जान थालेपछि मानिसहरूले लोडसेडिङको तालिका नै सार्वजनिक गर्न विद्युत प्राधिकरणसँग माग गरेका छन्।
झ्यापझ्याप्प बत्ती गइरहने क्रम बढेपछि अनेक आशंका उठेको छ। कतिपयले त अघोषित लोडसेडिङ गरिएको भन्दै सरकारको आलोचना गरेका छन्।
