देउवाले प्रतिनिधिसभा विघटन विरुद्ध गरिने बिरोध प्रदर्शनमा व्यापक सहभागिताका लागि सबैमा अपिल गरेका छन्

नेपाली कांग्रेसका सभापति एवं पूर्व प्रधानमन्त्री शेरबहादुर देउवाले ओली सरकारको सिफारिसमा राष्ट्रपतिले प्रतिनिधिसभा विघटन गरिएको घटना विरुद्ध यहि पुस १३ गते १६५ वटै क्षेत्रमा गरिने बिरोध प्रदर्शनमा व्यापक सहभागिताका लागि सबैमा अपिल गरेका छन् ।नेपाली कांग्रेसको केन्द्रिय समितिको निर्णय अनुसार संसद् विघटन विरुद्ध १६५ वटै निर्वाचन क्षेत्रमा विरोध प्रदर्शन आयोजना गर्न लागिएको हो । कांग्रेस सभापति देउवाले आज एक अपिल जारी गर्दै पार्टीका सम्पूर्ण तहाका सदस्य, शुभचिन्तक र सबै लोकतन्त्रवादीलाई विरोध प्रदर्शनमा सरिक भएर उक्त कदमका विरुद्ध ऐक्यबद्धता प्रकट गर्न पनि हार्दिक अपिल गरेका हुन् ।

ओली सरकारको गैर संवैधानिक कदमका विरुद्ध सिंगो कांग्रेस सम्पूर्ण रुपले एकमतका साथ उभिएको उल्लेख गर्दै उनले जारी केन्द्रीय कार्यसमितिको बैठकमा आफैँले १३ गते प्रदर्शन गर्ने प्रस्ताव गरेर केन्द्रीय कार्यसमितिको निर्णयपश्चात अहिले सम्पूर्ण ध्यान प्रदर्शनमा केन्द्रित गरेको पनि बताए।

गत आइतबार सरकारले प्रतिनिधिसभा विघटन गरेपछि कांग्रेसले यसलाई असंवैधानिक, अलोकतान्त्रिक र अधिनायकवादउन्मुख भनेको थियो ।