खर खडाइका लागि बर्दिया निकुञ्ज प्रवेश गरेका बारबर्दियाका एक जनाको ज्यान गएको छ भने एकजना भालुको आक्रमणमा परि घाइते भयेका छन् ।
बर्दिया निकुञ्जको चुरे क्षेत्रमा बाबियो काट्न गएका बेला बारबर्दिया नगरपालिका सिउनिया घुस्राका ४२ वर्षीय वरन्तु थारुको निकुञ्जभित्रै ज्यान गएको निकुञ्जले जनाएको छ ।
उनकाे ज्यान जानुकाे मुख्य कारण खुल्न नसके पनि भिरबाट लडेर ज्यान गएको हुनसक्ने प्रारम्भिक अनुमान गरिएको निकुञ्जका सहायक संरक्षण अधिकृत अशिम थापाले जानकारी दिए ।
बनिया भारबाट प्रहरी र निकुञ्जको टोली घटनास्थलतर्फ गएको बर्दिया राष्ट्रिय निकुञ्जका प्रमुख संरक्षण अधिकृत विष्णुप्रसाद श्रेष्ठले बताए । यस्तै बर्दिया राष्ट्रिय निकुञ्जको उत्तरी क्षेत्र भास तालनजिक भालुको आक्रमणबाट एक जना घाइते भएका छन् ।
घाइतेको आँखा र हातमा चोट लागेको छ । उनको नाम ठेगाना खुल्न नसकेको र घाइतेलाई उपचारका लागि नेपालगञ्ज मेडिकल कलेज कोहलपुर लगिएको निकुञ्जले जनाएको छ । बर्दिया राष्ट्रिय निकुञ्जले मध्यवर्ती क्षेत्रका स्थानीयका लागि हरेक वर्षझैँ यसवर्ष पनि शनिबारदेखि तीन दिनका लागि निकुञ्ज प्रवेश खुल्ला गरेको छ ।
