ताप्लेजुङको पाथीभरा मन्दिर क्षेत्रको सामुदायिक वनमा भीषण डढेलो लागेको छ।
बिहान ९ बजेदेखि लागेको डढेलो तीव्र हावाका कारण फैलिइरहेको प्रमुख जिल्ला अधिकारी झरेन्द्रप्रसाद चापागाईंले बताए।
मन्दिरको दक्षिणपट्टीको थावाखोला सामुदायिक वनमा डढेलो लागेको चापागाईंले बताए। वनमा कसैले डढेलो लगाएको आशंका गरिएको छ।
बिहीबार पनि सो वन क्षेत्रमा डढेलो लगाइएको थियो। मन्दिरका कर्मचारी र प्रहरीले आगो नियन्त्रणमा लिएका थिए।
डढेलो तीव्र फैलिइरहेकाले निभाउनका लागि सदरमुकामबाट मेजरको नेतृत्वमा ३० जनाको नेपाली सेनाको टोली, प्रहरी निरीक्षकको नेतृत्वमा २० जना प्रहरी र सशस्त्र प्रहरी निरीक्षकको नेतृत्वमा १५ जनाको टोली पाथीभरा क्षेत्र पठाइएको चापागाईंले बताए।सदरमुकामबाट पाथीभरा पुग्न अढाइ घन्टा लाग्छ। स्थानीय, पाथीभरा क्षेत्रमा खटिएका प्रहरी र सदरमुकामबाट पठाइएको टोलीले डढेलो निभाउने चापागाईंले बताए।
