काठमाडौंको बल्खुमा प्रहरीको चेकिङ छलेर भागेको भ्यानले ठक्कर दिँदा एक पैदलयात्रुको मृत्यु भएको छ भने ट्राफिक प्रहरी जवान घाइते भएका छन्।
शुक्रबार राति चेकिङ भइरहेका बेला भाग्ने क्रममा बा १६ च २९१५ नम्बरको भ्यानले पैदलयात्रीलाई ठक्कर दिँदा गोरखा घर भएर कीर्तिपुर बस्दै आएका ५४ वर्षका काले आलेमगरको मृत्यु भएको महानगरीय प्रहरी महाशाखाले जनाएको छ ।
मगरको उपचारको क्रममा बल्खुस्थित बयोधा अस्पतालमा मृत्यु भएको हो ।
प्रहरीका अनुसार चेकिङमा रहेका ट्राफिक प्रहरी प्रभाग बल्खुमा कार्यरत प्रहरी जवान २३ वर्षिय मानबहादुर साउदलाई ठक्कर दिएर भागेको भ्यानले मगरलाई पनि ठक्कर दिएको हो ।
जवान साउदको वयोधा अस्पताल वल्खुमै उपचार भइरहेको छ। भ्यानलाई प्रहरीले नियन्त्रणमा लिए पनि चालक फरार छन्। फरार चालकको खोजी भइरहेको महानगरीय प्रहरी वृत कालिमाटीले जनाएको छ।
